Norðursigling og Björgunarsveitin Garðar gera styrktar- og samstarfssamning til 3 ára

Stefán Jón og Birgir takast í hendur.

Í síðustu viku skrifuðu Stefán Jón Sigurgeirsson, fram-kvæmdastjóri Norðursiglingar, og Birgir Mikaelsson, formaður Björgunarsveitar-innar Garðars, undir styrktar- og samstarfssamning til næstu 3 ára þar sem Norðursigling styrkir sveitina um 4 milljónir.

Með samningnum vill Norðursigling styðja við hið mikilvæga og góða starf sem unnið er hjá Garðari og leggja til fjármagn sem nýtist til kaupa á nýjum björgunarbáti sveitarinnar.

Sjöfn er samskonar bátur og Villi Páls.

Báturinn sem fengið hefur nafnið „Villi Páls“ mun án nokkurs vafa bæta þjónustu og viðbragðstíma á flóanum sem mun leiða af sér enn meira öryggi við farþegaflutninga á Skjálfanda.

Einnig munu félögin auka samstarfið með sameiginlegum björgunaræfingum tvisvar á ári sem er mikilvægur liður í að tryggja enn betra viðbragð og samhæfingu á flóanum.

„Við erum afskaplega ánægð að geta stutt við kaup Björgunarsveitarinnar Garðars á nýjum björgunarbáti og taka þátt í því að það verði að veruleika. Nýr og öflugur bátur mun án nokkurs vafa auka öryggi allra aðila sem eiga leið um Skjálfanda og þar á meðal okkar farþega og starfsfólks. Við erum spennt að efla samstarfið við björgunarsveitina og teljum í því samhengi mjög mikilvægt að hefja þessa vegferð að auknum og reglulegum sameiginlegum björgunaræfingum. Ég vil óska Garðari til hamingju með Villa Páls,“ segir Stefán Jón Sigurgeirsson framkvæmdastjóri Norðursiglingar.

„Við erum mjög ánægð og þakklát fyrir þennan samning við Norðursiglingu og stuðning þeirra við þessi kaup. Þetta eru virkilega ánægjuleg tímamót í samstarfi sveitarinnar við Norðursiglingu og við hlökkum til að efla það enn frekar á komandi árum,“ segir Birgir Mikaelsson formaður Björgunarsveitarinnar Garðars.

Stefán Jón Sigurgeirsson ásamt björgunarsveitarfólkinu Birgi Mikalessyni, Ástþóri Stefánssyni, Sæunni Björnssdóttur og Ingibjörgu Benediktsdóttur.