Mynd dagsins - Villi Páls og Sigrún Anna með bikarinn

Villi Páls og Anna Sigrún með bikarinn.

Mynd dagsins var tekin við íþróttahöllina í dag að loknum blakleik hjá Völsungskonum.

Hún sýnir Vilhjálm Pálsson fv. íþróttakennara ásamt sonar-dóttur hans Sigrúnu Önnu Bjarnadóttur.

Saman halda þau á bikar sem kvennalið Völsungs fékk afhentan í dag en liðið er deildarmeistari 1. deildar eins og kom fram á 640.is fyrr í kvöld.

Villi og Védís Bjarnadóttir kona hans hafa lagt sitt til blaklífsins á Húsavík og vel það. Sannkallaðir brautryðjendur.

Þau störfuðu í áratugi við kennslu og þjálfun og þar var blakið alla tíð í hávegum haft og óhætt að segja að þau hafi lagt grunninn að því góða starfi sem hefur alla tíð verið í kring um blakíþróttina á Húsavík. 

Þess utan hafa börn þeirra og nú barnabörn leikið blak með Völsungi og er Sigrún Anna yngst þeirra. Hún átti, að mati ljósmyndara 640.is, afbragðsleik með Völsungum í dag þegar stelpurnar lögðu Ými að velli í fyrri leik liðanna í undanúrslitum 1. deildar kvenna.

Villi Páls og Sigrún Anna Bjarnadóttir með bikarinn sem Völsungur fékk fyrir deildarmeistaratitilinn í 1. deild kvenna árið 2021.