Mynd dagsins - Íbúafundur um tækifæri í nýsköpun á Norðurlandi

Mynd dagsins var tekin á íbúafundi sem Íslensk verðbréf hf. og Íslandsþari ehf. héldu síðdegis í dag á Fosshótel Húsavík.

Fundurinn var vel sóttur en á honum voru kynntar fyrir fundargestum hugmyndir og möguleikar í nýsköpun á svæðinu. 

Aðallega var farið yfir áform tengd rannsóknar- og nýtingarleyfi á stórþara úti fyrir norðurlandi og vinnslu afurðarinnar í landi.

Einnig var farið yfir þau tækifæri sem í þeim nytjum felast fyrir samfélög eins og Húsavík.

Fyrirtækið hefur ekki ákveðið endanlega staðsetningu uppbyggingarinnar en horft er til þriggja staða á Norðurlandi; Akureyri, Húsavík eða Dalvík. 

Sveitarstjóri Norðurþings kynnti tvo valkosti innan hafnarsvæðisins sem sveitarfélagið horfir á með tilliti til staðsetningar landvinnslunnar á Húsavík.

Annars vegar lóð á fyllingu í Suðurfjörunni og hinsvegar á lóð vestan slökkvistöðvar Norðurþings.

Á fundinum kom m.a fram að fullbyggð starfsemi gæti endað í um 80 störfum af ýmsu tagi sem aldeilis væri búbót fyrir smærri samfélög á landsbyggðinni.

Fyrirtækið þarf um 10.000 m² lóð nærri löndunarbryggju til að byggja upp sín 4.000 m² mannvirki. Horft er til þess að nýta hitaveituvatn til að þurrka hráefnið.

Aðstandendur verkefnisins telja ekki líkur á lyktarmengun eða hávaðamengun þó fyrirtækið yrði staðsett á hafnarsvæði Húsavíkur.

Á myndinni eru Snæbjörn Sigurðarson og Hafþór Jónsson th. ásamt Colin Hepurn frakvæmdarstjóra Íslandsþara ehf. 

Þeir sýndu fundargestum í fundarlok nokkrar vörur sem innihlada efni sem koma úr stórþaranum.