Mikilvægt að koma orkumálum við Langanes í betri farveg

Starfshópurinn ásamt sveitarstjórnarfulltrúum.

Guðlaugur Þór Þórðarson, umhverfis- og auðlindaráðherra, kynnti ívikunni  skýrslu starfshóps sem ráðuneytið skipaði á síðasta ári til að vinna aðgerðir sem heyra undir málefnasvið ráðuneytisins og stuðlað geta að því að efla samfélagið á Langanesi.

Frá þessu segir á heimasíðu SSNE en starfshópurinn var skipaður þeim Njáli Trausta Friðbertssyni, sem var formaður hópsins, Berglindi Hörpu Svavarsdóttur og Steingrími J. Sigfússyni.

Er það mat starfshópsins að forgangsmál sé að stórauka flutningsgetu á raforku til Þórshafnar og nágrennis og að beinast liggi við að slíkt verði gert með nýrri og öflugri raflínu frá Öxarfirði til Þórshafnar, sem yrði hluti af flutningskerfi Landsnets.

Í skýrslu sinni leggur hópurinn enn fremur til að ráðuneytið vinni áfram tillögur um friðlýsingarkosti á utanverðu Langanesi og að stofnaður verði þjóðgarður í sátt við íbúa og hagsmunaaðila. Samhliða verði unnið að uppbyggingu innviða og m.a. horft til þess að koma upp starfstöð í náttúrurannsóknum, sem er í samræmi við tillögur nefndar fulltrúa fimm ráðherra um málefni byggðarinnar við Bakkaflóa frá árinu 2018.

Þá leggur starfshópurinn til aðgerðir til þess að styðja við græna atvinnuuppbyggingu á svæðinu, að stutt verði við jarðhitaleit á svæðinu og að skoðaðir verði möguleikar á orkuöflun á svæðinu í samstarfi við orkufyrirtæki.

Á fundi með sveitarstjórnarfólki Langanesbyggðar og þingmönnum kjördæmisins sagði Guðlaugur Þór stefnu ráðuneytisins skýra, og að hann sem ráðherra styddi þessar tillögur heilshugar: „Ég fagna tillögum starfshópsins, sem sýna enn og aftur mikilvægi þess að orkumálum okkar verði komið í betri farveg. Skýrslunni verður fylgt eftir og er eitt af mínum næstu verkum að heimsækja svæðið og ræða við heimafólk um þessi mál.“

Skýrsla starfshóps um eflingu samfélagsins á Langanesi á málefnasviði umhverfis-, orku- og loftslagsráðuneytisins