Listahátíðin Skjálfandi tileinkuð listakonunni Huldu í ár

Listahátíðin Skjálfandi er innileg og falleg listahátíð yfir heila kvöldstund í samkomuhúsinu á Húsavík.

Fjölmargir listamenn, bæði brottfluttir sem og heimamenn, hafa tekið þátt í hátíðinni, og verður hátíðin hin glæsilegasta í ár. Í tilefni af 10 ára afmælishátíð Skjálfanda er hátíðin í ár tileinkuð listakonunni Huldu og hinum undurfallega Skjálfandaflóa.

Una Stef ásamt hljómsveit og kammerkórnum Aurora, kemur fram með samstarfsverkefnið Huldumál - ný íslensk sönglög við ljóð Huldu. Huldumál var frumflutt í Fríkirkjunni í Reykjavík í þann 19. október s.l. og er það okkur sannur heiður að taka á móti þessum listamönnum og færa verkefnið hingað heim til Húsavíkur, og gefa öllum bæjarbúum kost á að hlusta á og njóta áhrifamikilla ljóða Huldu gædd tónlist og söng. Eins og Húsvíkingar margir vita var Hulda (Unnur Benediktsdóttir Bjarklind) íslenskt ljóðskáld og rithöfundur. Hulda fæddist árið 1881 og ólst upp á Auðnum í Laxárdal í Þingeyjarsýslu. Hún bjó, ásamt eiginmanni sínum Sigurði fyrrum Kaupfélagsstjóra, löngum á Húsavík.

Í sönglögunum gerir Una tilraun til að gefa kveðskap Huldu nýtt líf í formi tónlistarinnar. Lögin voru samin sérstaklega fyrir kvennakór, en rauði þráður verkefnisins var hugsunin; ‘Frá konu til konu’. Frá Huldu til Unu, frá Unu til söngkvennanna í kórnum og frá þeim munu orð Huldu lifa áfram með okkur í tónum sem og á riti. Það er okkur sannur heiður að tileinka hátíðinni þessari miklu listakonu, og bæjargersemi, og við hvetjum bæjarbúa til að láta ekki þetta einstaka tækifæri fram hjá sér fara. Heiðurslistamaður Skjálfanda í ár verður því listakonan Hulda.

Hátíðin hefur hingað til lagt áherslu í að tengja ólíka flóru listamanna í bæjarfélaginu og verið hvatning og vettvangur fyrir bæði unga sem aldna til að fara út fyrir þægindarammann og gera tilraunir með list sína og sköpun. Allt er leyft, allri skapandi vinnu og miðlun er tekið fagnandi - allt frá ljósmyndum til listaverka, frá uppistandi, gjörningum, leiklist og til tónlistar, frá verkefnum sem eru að fullu tilbúin og til verka í vinnslu. Hátíðin er samstarfsverkefni einstaklinga, hópa og listgreina úr Norðurþingi og hefur reynst stökkpallur fyrir jaðarlistamenn á Húsavík.

Auk Huldumála, munu um 20 aðrir listamenn, áhrifavaldar, uppistandarar og skapandi einstaklingar taka þátt í Skjálfanda í ár, með tónlist, sjónlist, myndlist, ljóðlist, ritlist, gjörningalist, uppistand, sjálfslist og hvers konar öðrum skapandi uppákomum.

Yfir hátíðardaginn verða Ocean Missions, í samstarfi við Samtök um verndun í og við Skjálfanda, með opna vinnusmiðju sem hefst kl. 16.30, þar sem þátttakendum gefst kostur á að endurnýta og endurgera úr rusli sem hópurinn hefur safnað saman við strendur Húsavíkur og Norðurþings síðasta liðnar vikur. Afrakstur þeirrar vinnu verður svo sýndur á hátíðinni um kvöldið.

Að auki mun Tónasmiðjan flytja valda hluta úr verki sínu Hetjur, sem við erum afar spennt fyrir.

Þar fyrir utan munu ýmsir listamenn vera með sjónlist og myndlist til sýnis á hátíðinni í ár, og einnig munu kvikmyndaverk spila stórt hlutverk á hátíðinni. Björn Grétar mun einnig kitla hláturtaugarnar með ýmsum sögum úr pabbalífinu, og að sjálfsögðu mun okkar ástsæla Hóffý Ben, ekki láta sig vanta á hátíð sem tileinkuð er Huldu, enda hefur Hóffý lagt ævistarf sitt í að hampa ljóðum Huldu og starfi.

Ókeypis er inn á hátíðina.

Húsavík við Skjálfanda

Opið haf og heiðkvöld skær þér himinn gaf.
Glóir vafinn Garðars bær
í geislatraf’.

Kinnarfjöllin bylgjublá und bjartri mjöll skjálfa öll í öldugljá sem álfahöll.

Logns í böndum blundar sær við bratta strönd,
inn með Söndum sést þó fjær á silfurrönd.

Lítil alda leikur sér, með ljósan fald.

Ægir sjaldnar sefur hér en sýnir vald.

Hér er frítt – þó skorti skóg og skjól sé lítt –
kveldskin hlýtt og hugrúm nóg við hafið vítt.

Hulda