Liljan, heiðurviðurkenning Þjóðkirkjunnar afhent

Á Kirkjudögum sem haldnir voru í Reykjavík í ágústmánuði síðastliðnum, var söngfólki sem sungið hefur í kirkjukórum landsins í 30 ár eða fleiri, afhent heiðursviðurkenning Þjóðkirkjunnar, Liljuna.

Við þetta tilefni var þeim þakkað fyrir þeirra ómetanlegu þjónustu en frá þessu segir á vef Húsavíkurkirkju.

Þar sem félagar úr Kór Húsavíkurkirkju áttu ekki heimangengt á Kirkjudaga, afhenti Pétur Helgi Pétursson, formaður kirkjukórsins,  þeim Liljuna að lokinni messu sl. sunnudag. 

Í fréttinni segir:

Mörg þeirra hafa sungið með fleiri kórum en á Húsavík um ævina og líklega má segja að sum hafa sungið mun lengur en tekið er fram hér,  byrjuðu að mæta á æfingar sem börn/ unglingar með foreldrum sínum þó hafi ekki verið formlegir félagar í kór. Eins og Baldur sagði, frá því hann var í móðurkviði hefur hann mætt á kirkjukórsæfingar.

Í þakklæti og gleði fyrir störf þeirra flytjum við þeim innilegar hamingjuóskir og mikið erum við á Húsavík rík að eiga svona frábæran kór við kirkjuna okkar.

Á myndinni eru frá vinstri: Helga Þórarinsdóttir ( Kirkjukór Húsavíkur í 54 ár ), Jónína Hallgrímsdóttir (Kirkjukór Húsavíkur og kór Grenjaðarstaðarkirkju í 51 ár), Lilja Skarphéðinsdóttir ( Kirkjukór Húsavíkur í 30 ár ), Ragnhildur Jónsdóttir ( Kirkjukór Húsavíkur og Garðssókn í Kelduhverfi, 40 ár), Baldur Baldvinsson  (Kirkjukór Húsavíkur og Þóroddstaðarsókn, 56 ár), Hildur Baldvinsdóttir (Kirkjukór Húsavíkur og Þóroddsstaðarsókn, 50 ár), Sólveig Jónsdóttir ( Kirkjukór Húsavíkur og Kirkjukórinn á Stöðvarfirði, 50 ár) og Sigrún Sigurbjörnsdóttir ( Kirkjukór Húsavíkur og Þverárkirkja í Laxádal, í 30 ár)

Á myndina vantar Elfu Signýju Jónsdóttur sem sungið hefur með Kirkjukór Húsavíkur í 40 ár.