Leikfélag Húsavíkur og Ungmennafélagið Efling meðal styrkþega úr Samfélagssjóði Eflu

23. júl

Leikfélag Húsavíkur og Ungmennafélagið Efling meðal styrkþega úr Samfélagssjóði Eflu
Almennt - - Lestrar 71

Samfélagssjóður EFLU veitti á dögunum fjárstyrki til sjö samfélagsverkefna og meðal styrkhafa eru Leikfélag Húsavíkur og Ungmennafélagið Efling.

Leikfélag Húsavíkur

Á hverju ári setur Leikfélag Húsavíkur upp metnaðarfulla leiksýningu. Það er hópur sjálfboðaliða sem sér um allan búningasaum og hafa þátttakendur oftar en ekki þurfta að reiða sig á gamlar og þreyttar vélar, eða lagt til sínar eigin. Styrkurinn verður nýttur til kaupa á tveimur saumavélum, einni venjulegri og annarri svokallaðri Overlock.

Hjalti Már Bjarnason, svæðisstjóri EFLU á Norðurlandi og Dómhildur Antonsdóttir frá Leikfélagi Húsavíkur.

Ungmennafélagið Efling

Styrkur til Ungmennafélagsins Efling sem verður nýttur til að endurnýja keppnisáhöld vegna Meistaramóts Íslands fyrir 11-14 ára í frjálsíþróttum sem haldið verður að Laugum í sumar. Þátttakendur á MÍ koma víðsvegar að af landinu og hefur mótið verið vel sótt. Á síðasta ári voru þátttakendur um 160 talsins og von er á álíka fjölda að Laugum í sumar, styrkurinn kemur því til með að nýtast fjöldanum öllum af ungu frjálsíþróttafólki af öllu landinu.

Hjalti Már Bjarnason, svæðisstjóri EFLU á Norðurlandi og Gunnhildur Hinriksdóttir frá UMF. Eflingu.

Ljósmyndir Efla.is

Samfélagssjóður EFLU hefur verið starfræktur frá 2013 og er úthlutað úr sjóðnum tvisvar á ári. Markmið sjóðsins er að styðja við framtak einstaklinga og hópa sem stuðla að farsælli þróun samfélagsins, auknum lífsgæðum og fjölbreyttu mannlífi. Umsóknir eru metnar út frá markmiðum sjóðsins, markmiðum EFLU og áherslum valnefndar.

« Til baka