Kraftmikið uppbyggingarstarf í Verbúðunum

Hönnuðir og listafólk hafa um tveggja ára skeið haft afnot af húsnæði í gömlu verbúðunum á Húsavík sem áður var nýtt sem geymslur. Þar hafa þau verið með vinnustofur og staðið fyrir viðburðum og byggt upp tengslanet listafólks og hönnuða bæði á Íslandi og erlendis.

Á þeim grunni gerðu Menningarfélagið Úti á Túni og sveitarfélagið Norðurþing, eigandi verbúðanna, samning um afnot og sameiginlega uppbyggingu verbúðanna til ársloka 2016. Tilgangurinn með samningnum er að auðga mannlíf á svæðinu, styðja við menningu og skapandi greinar og stuðla að nýsköpun, skapandi hugsun og menningarlegum fjölbreytileika.

Í verbúðunum er boðið upp á vinnustofur fyrir listamenn, sýningarrými og tæknismiðju í samvinnu við söfn og stofnanir á svæðinu. Mikil undirbúningsvinna er að baki og sumt vel komið af stað en annað skemur. Listamenn hafa fengið inni og haldið sýningar og aðra viðburði, tæknismiðja er til staðar með laserskurðavél á vegum Hönnunarverksmiðjunnar auk örtölva og 3D prentar sem er í eigu Þekkingarnets Þingeyinga og verða þau tæki nýtt til menntunar almennings á sviði tækni og nýsköpunar.

Í vetur er Marina Rees umsjónarmaður í verbúðunum og verkefnisstjóri Fjúk en hún hefur einnig vinnuaðstöðu þar ásamt fleirum sem hafa skapandi greinar að atvinnu, en stjórn Úti á Túni heldur utan um og stýrir starfseminni. Allt starf tengt Fjúk og viðburðum í verbúðinni er unnið í sjálfboðavinnu en unnið er að því að verkefnið verði sjálfbært og er markaðssetning þess erlendis stór þáttur í því en Fjúk mun taka á móti 4 gestum frá janúar til apríl 2015 sem munu leigja vinnuaðstöðu í lengri eða skemmri tíma og koma þessir gestir frá Tyrklandi, Brasilíu og Englandi.

Í sumar voru 6 erlendir listamenn með aðstöðu í verbúðunum. Markmiðið er að það séu alltaf að minnsta kosti 2-4 gestir að vinnu á hverjum tíma en unnið er að því að tryggja húsnæði fyrir þá sem koma.

Hér er yfirlit yfir starfsemina í verbúðina og viðburði hingað til á árinu. 

Gestalistamenn:

Sonia Levy  & Filip Tyden (Frakkland & Svíþjóð)

Tom Fisher (England)

Sharon Swaine (England)

Billy A.B.  & Chloe Liu (England & Kína)

Listviðburðir:

Hljóðver eftir Tom Fisher í frystiklefa 3. verbúðar ("Glöggt er gest eyra") í maí 2014

Sýning nema í myndlistarvali Borgarhólsskóla í maí 2014

Málverkasýning eftir Sharon Swaine í júní 2014

Bæjartískusýning og myndlistarsýning eftir Billy A B & Chloe Liu í júlí 2014

Föst sýning í 2. verbúð með veggverki og viðarskúlptúr eftir Sam Rees

Tónlistarviðburðir:

Sad Owl Brothers - júlí 2014

KiraKira - júlí 2014

Einarindra - júlí 2014

Kvikmyndasýningar:

Amma Lo-fi - júlí 2014

Fastar sýningar á myndum Hrafns Gunnlaugssonar bæði í samkomuhúsinu og í bakrými 2. verbúðar.

Safn - sýningar:

Safn Marina Rees í 2. verbúð

Verslun:

Vísir er að verslun með listvarningi, bókum, skartgripum, prentverkum og minjagripum en umfangar hennar verður aukið hægt og rólega.

Námskeið og vinnustofur:

Námskeið og kvikmyndagerð með Miðjunni á Húsavík. Vor 2014

Námskeið í málun með Sharon Swaine - júlí 2014

"Þrífum fjöruna" verkefnið - október 2014

Í vinnslu eru listnámskeið í samvinnu við Eyþing og Tækninámskeið með Þekkingarneti Þingeyinga.

Mikil vinna fer í að undirbúa, skipuleggja, auglýsa og framkvæma hina ýmsu viðburði og þeir sem standa að verkefninu gefa eins og áður segir alla vinnu. Nú þegar nær dregur að jólum mun lifna yfir sýningahaldi og viðburðum eftir rólegt haust sem hefur farið í undirbúningsvinnu sem tengist gesta-listamönnum, umsóknum um styrki og myndun tengslanets og markaðsetningar en við vonum að eftir þessa innsýn í starfsemina þá muni bæjarbúar halda augunum opnum og fylgjast með starfseminu og vonandi sem allra flestir sæki þá viðburði sem eru auglýstir, yfirleitt á töflunum í Kaskó og Úrval auk þess að við erum með facebook síðu þar sem allir viðburðir eru kynntir með góðum fyrirvara:

https://www.facebook.com/fjukartanddesigncentre

Til að fræðast nánar um starfsemi Fjúk er einnig hægt að benda á eftirfarandi slóð:

http://fjukartcentre.tumblr.com/

Arnhildur Pálmadóttir.