Konráð Freyr Sigurðsson genginn til liðs við Völsung

Konráð Freyr Sigurðsson.

Konráð Freyr Sigurðsson, 25 ára miðjumaður, hefur samið við Völsung en hann kemur til félagsins frá Tindastóli. 

Konni, eins og hann er gjarnan kallaður, er hávaxinn og sterkur afturliggjandi leikmaður sem gríðarmikil ánægja er með að hafa náð í.

Hann getur einnig leyst hinar ýmsu stöður á vellinum og færir mikinn talanda inn í Völsungsliðið.

Konráð á að baki 120 meistaraflokksleiki fyrir Tindastól og Drangey og hefur skorað í þeim 15 mörk en hann var fyrirliði Tindastóls síðastliðin tvö tímabil.

Að sjálfsögðu má finna tengingu hjá Konna við Völsung og Húsavík, en faðir hans Siggi Donna þjálfaði Völsungsliðið árið 1985. Völsungar bjóða Konráð hjartanlega velkominn og hlakka mikið til þess að sjá hann í grænu treyjunni í sumar. 

Við sama tilefni skrifuðu nokkrir leikmenn undir tveggja ára samninga við félagið. Guðmundur Óli Steingrímsson, máttarstólpi í liðinu og hokinn af reynslu, réð á vaðið og í kjölfarið fylgdu hinir ungu Arnar Pálmi Kristjánsson, Elmar Örn Guðmundsson og Steinarr Bergsson. 

Fv: Björgvin Sigurðsson formaður meistaraflokksráðs karla, Elmar Örn Guðmundsson, Guðmundir Óli Steingrímsson. Arnar Pálmi Kristjánbsson, Steinarr Bergsson og Konráð Freyr Sigurðsson.

Þá framlengdi Ásgeir Kristjánsson einnig samning sinn áður en hann hélt aftur út til Bandaríkjanna í nám. 

Í fréttatilkynningu segiur að það sé félaginu mjög mikilvægt að jafnt ungir sem aldnir leikmenn sýni félaginu slíka tryggð og stefni að því að bæta sig sem leikmenn og Völsung sem lið.