Knattspyrnudeild Völsungs gengur frá ráðningu á þjálfurum meistaraflokka og yfirmanni knattspyrnumála

Björgvin Sigurðsson og Jóhann Kr. Gunnarsson.

Nú á dögunum gekk knattspyrnu-deild Völsungs frá ráðningu á þjálfurum fyrir komandi keppnistímabil í fótboltanum. 

Um er að ræða þau Aðalstein Jóhann Friðriksson, Jóhann Kristinn Gunnarsson og Jónu Birnu Óskarsdóttur.

Fv. Eva Björk Káradóttir, meistaraflokksráði kvenna, Alli Jói og Gunnar Jónsson í barna- og unglingaráði.

Í tilkynningu segir að meistaraflokksráð kvenna og Aðalsteinn Jóhann (Alli Jói) hafi gengið frá samningi þess efnis að Aðalsteinn mun þjálfa meistaraflokk kvenna næstu tvö árin. Stelpurnar hafa verið í þjálfaraleit frá því í haust, þegar John Andrews lét af störfum. Kvennaliðið átti algjörlega stórkostlegt tímabil á síðasta ári. Þær unnu 2. deildina með miklum yfirburðum, fóru taplausar í gegnum mótið og tryggðu sér þátttökurétt í 1. deild. Það eru ljóst að stelpnanna og Alla Jóa bíður ærið verkefni á komandi sumri.

Knattspyrnudeildin er hins vegar í skýjunum með þessa ráðningu. Alli Jói hefur þrátt fyrir ungan aldur gríðarlega reynslu af þjálfun yngri flokka hjá félaginu, hefur sótt sér mikla menntun í faginu (UEFA-A gráðu) og hefur umfram allt gríðarlegan metnað sem þjálfari. Það er því mikil tilhlökkun, eftirvænting og bjartsýni hjá deildinni með þessa ráðningu.

Alli Jói hefur þó ekki sagt skilið við þjálfun ungra og upprennandi Völsunga. Við þetta sama tækifæri skrifaði hann einnig undir samning við barna- og unglingaráð félagsins um að þjálfa 3. flokk kvenna og 6. flokk karla.

Bergþóra Höskuldsdóttir formaður Völsungs og Jóhann Kristinn Gunnarsson þjálfari og yfirmaður knattspyrnumála hjá Völsungi. Að baki þeim standa Gunna Jónsson í barna- og unglingaráði og Björgvin Sigurðsson í knattspyrnuráði meistaraflokks karla.

Meistaraflokksráð karla og Jóhann Kristinn skrifuðu einnig undir samning sem felur í sér að Jóhann mun þjálfa meistaraflokk og 2. flokk karla næstu tvö árin. Jóhann hefur sinnt þessu sama starfi af kostgæfni undanfarin þrjú ár og er mikil ánægja í röðum Völsunga með að fá að njóta áframhaldandi krafta þessa reynda þjálfara á næstu árum.

Auk þess að þjálfa fyrrgreinda flokka mun Jóhann einnig starfa sem yfirmaður knattspyrnumála hjá félaginu næstu tvö árin. Að þessari ráðningu koma barna- og unglingaráð og meistaraflokksráð Völungs.

Um er að ræða nýtt starf sem ætlað er að gera allt það góða starf sem unnið er í knattspyrnunni á Húsavík enn betra. Yfirmaður knattspyrnumála mun bera ábyrgð á öllu faglegu starfi innan knattspyrnunnar á Húsavík, hvort sem um er að ræða allra yngstu iðkendur eða meistaraflokka félagsins, að auka sýnileika knattspyrnudeildar og samræma og framþróa vinnubrögð þjálfara Völsungs og sjá til þess að sú þekking haldist innan félagsins. Þetta er stórt og mikið starf sem ætlað er að efla knattspyrnuna á Húsavík enn frekar og líklega enginn betur til þess fallinn að þróa starfið til framtíðar en Jóhann.

Þjálfararnir Aðalsteinn Jóhann Friðriksson, Jóna Birna Óskarsdóttir og Jóhann Kristinn Gunnarsson.

Síðast enn ekki síst hafa barna- og unglingaráð og meistaraflokkar komist að samkomulagi við Hreystiþjálfun um að sjá um fitness þjálfun fyrir komandi knattspyrnusumar. Þjálfari verður Jóna Birna Óskarsdóttir, en hún hefur séð um þjálfun Metabolic hér í bæ síðustu ár við góðan orðstír. Jóna Birna mun sjá um fitness þjálfun knattspyrnumanna- og kvenna Völsungs frá 4. flokki og upp í meistaraflokka.

Í tilkynningunni kemur fram að gríðarleg ánægja sé meðal forsvarsmanna knattspyrnudeildar með þessa ráðningu og hefur Jóna nú þegar tekið til við að koma leikmönnum félagsins í alvöru stand fyrir komandi áskoranir.

Ánægjulegar fréttir úr starfi knattspyrnunnar og ljóst að með ráðningu á þessu þríeyki er knattspyrnufólk félagsins, stórt sem smátt, í sérstaklega góðum höndum.

Áfram Völsungur!