Jóney Ósk og Kristný Ósk skrifa undir hjá Völsungi

Kristný Ósk og Jóney Ósk. Lj. volsungur.is

Jóney Ósk Sigurjónsdóttir og Kristný Ósk Geirsdóttir leikmenn kvennaliðs Völsungs skrifuðu undir samninga við félagið á dögunum.  

Þær bætast þar með við ört stækkandi hóp leikmanna liðsins sem ætlar sér stóra hluti á komandi keppnistímabili.

Jóney Ósk er 25 ára varnar- og miðjumaður.  Hún hefur spilað 101 leik fyrir Völsung og skorað 11 mörk.  Samtals hefur hún spilað 135 leiki í meistaraflokki en hún hefur einnig leikið tvö tímabil með Keflavík.

Kristný Ósk er 18 ára efnilegur markmaður sem hefur leikið með Völsungi allan sinn feril og á að baki 18 leiki í meistaraflokki.

John Andrews þjálfari liðsins segist á heimasíðu Völsungs vera ánægður með undirskriftir þessara leikmanna og segir hópinn alltaf að styrkjast. 

Hann lofar spennandi sumri með flottum hópi reynslumikilla leikmanna í bland við ungar og efnilegar stelpur sem nú koma af krafti inn í meistaraflokkinn.