Ingólfur Bragi Gunnarsson ráðinn framkvæmdastjóri Mýsköpunar ehf

Stjórn Mýsköpunar hefur ráðið Ingólf Braga Gunnarsson sem framkvæmdastjóra Mýsköpunar og kemur hann til starfa í byrjun september.

Ingólfur hefur áralanga reynslu af líftæknitengdri starfsemi sem yfirmaður ræktunar hjá Algalíf og sem forstöðumaður hagnýtrar líftækni hjá Running Tide.

Hann hefur mikla reynslu af nýsköpun og rannsóknum, s.s. á endurnýjanlegum orkugjöfum og framleiðslu verðmæta með líftækniaðferðum, ásamt því að hann hefur skrifað fjölda vísindagreina og er eigandi einkaleyfis á því sviði.

Ingólfur er með Ph.D. í líftækni frá DTU, M.Sc. í líftækni frá Uppsalaháskóla og B.Sc. í líftækni frá Háskólanum á Akureyri. Ingólfur er að flytja til Akureyrar með fjölskyldu sína en hann er Akureyringur að uppruna, giftur og tveggja barna faðir.

Mögnum ráðningarstofa sá um ráðningarferli og leiddi Sigríður Ólafsdóttir þá vinnu en alls bárust 15 umsóknir um starfið.

Um Mýsköpun

Mýsköpun ehf er nýsköpunarfyrirtæki staðsett í Mývatnssveit. Markmið félagsins að framleiða og selja örþörunga, meðal annars þá sem upphaflega eru ættaðir úr Mývatni og félagið hefur einangrað. Landsvirkjun og Mýsköpun hafa gert með sér samning um nýtingu á húsnæði í Bjarnarflagi í Mývatnssveit.