Hvaða hagsmunir eru hér í forgangi?

Hjálmar Bogi Hafliðason.

Íbúar hvers sveitarfélags verða að geta treyst því og trúað að þeir einstaklingar sem fara með stjórn þess vinni af fullum heilindum með hagsmuni heildarinnar að leiðarljósi.

Sveitarstjórn á að vera sameiningarafl samfélagsins. Fulltrúar minnihluta sveitarstjórnar hafa kallað eftir upplýsingum, spurt spurninga, komið með tillögur og gagnrýnt með málefnalegum hætti. Því miður, og ég segi því miður þá virðist það vera leiðarljós meirihluta sveitarstjórar að hunsa minnihlutann algjörlega, þessir fjórir fulltrúar af níu sem mynda stjórn samfélagsins og bera sömuleiðis ábyrgð á stafsemi þess. Stjórnmálafólk þarf að móta með sér þann hugsunarhátt sem gerir þeim kleift að leysa vel af hendi þau verkefni sem við stöndum sameiginlega frammi fyrir. Vissulega geta einstaklingar beitt aflsmunum í krafti meirihlutavalds, keyrt mál í gegn án heilbrigðrar umræðu og vangaveltna! Hver og einn verður að svara því hvort að það sé eftirspurn eftir þannig stjórnmálum?

Hafnað að móta stefnu

Á síðasta fundi sveitarstjórnar Norðurþings voru tvö mál keyrð í gegn í krafti valds; spurningum ekki svarað, takmörkuð umræða og meira að segja málum vísað út úr stjórnsýslunni á annan vettvang. Í samþykktum Norðurþings segir m.a. í kafla um verkefni sveitarstjórnar; „Að móta stefnu fyrir starfsemi sveitarfélagsins, sviða, fyrirtækja og deilda‟. Þannig höfum við nefndir á vegum sveitarfélagsins.

Hafnað að skoða málið

Skipulags- og framkvæmdaráð fer með umhverfismál. Á fundi sveitarstjórnar kom fram virkilega þörf og góð tillaga um að móta umhverfisstefnu Norðurþings. Eitthvað sem allir eru sammála um að þurfi að gera. Undirritaður kom með tillögu um að vísa málinu í þá nefnd sveitarfélagsins sem fer með málaflokkinn enda mikilvægt að setja sér markmið, varða leiðina, setja fram spurningar og mynda sér sýn um málið. Því var hafnað af meirihlutanum og sveitarstjóra falið að semja við þriðja aðila. Nei, málið keyrt í gegn án efnislegrar umræðu um málið sjálft. Óvandað og vond byrjun á þörfu og góðu máli.

Hafnað að tryggja hagsmuni Norðurþings

Á sama fundi sveitarstjórnar lág fyrir kynning Umhverfisstofnunar á tillögu að friðlýsingu vatnasviðs Jökulsár á Fjöllum. Athugasemdum um málið á að skila í seinnipart janúar 2019. Ég tel að um það eru flest allir sammála um að vernda ánna gagnvart vatnsaflsvirkjunum eins og þetta mál fjallar um. En við þetta vakna ýmsar spurningar gagnvart öðrum málum. Orkuveita Húsavíkur á borholur á svæðinu. Hefur málið áhrif á frekari orkuvinnslu? Skaðar það hagsmuni Orkuveitunnar? Á svæðinu eru varnargarðar sem varna flóði úr ánni í aðrar ár. Hefur málið áhrif á þær framkvæmdir? Við þessum spurningum átti meirihlutinn ekki svör og algjörlega óábyrgt að lýsa yfir stuðningi við málið að svo stöddu. Fulltrúi E-lista bar upp tillögu um að fresta málinu til að fá úr því skorið. Því hafnaði meirihluti sveitarstjórnar. Hugsa sér. Ef menn hefði staldrað við, leitað svara og lagt málið fyrir að nýju þannig að allir kjörnir fulltrúar, þ.e. sveitarstjórn öll hefði með sóma getað lýst sig ánægða með friðlýsinguna. Nei. Hér velja menn ófrið, deilur og þrætur umfram sátt og að standa sterk saman. Í málum sem þarf ekki að beita aflsmunum til að knýja fram vilja sinn. Til hvers að etja fólki saman í krafti valdsins?

Hjálmar Bogi Hafliðason

Oddviti Framsóknar & félagshyggju

Norðurþingi