Húsavíkurstofa verður Markþing

Aðalfundur Húsavíkurstofu fór fram í Sjóminjasafninu í gær.

Á dagskrá voru hefðbundin aðalfundarstörf. Gerðar voru nokkrar smávægilegar breytingar á lögum félagsins.

Einnig var samþykkt að breyta nafni félagsins í Markþing. Þetta nafn hafði félagið áður borið, en nafnið Húsavíkurstofa var tekið upp árið 2010.

Í rökstuðningi fyrir nafnabreytingunni í gær sagði meðal annars: „Markaðsráð Húsavíkur og nágrennis var stofnað árið 2002. Nokkrum árum síðar var nafninu breytt í Markþing enda nær umráðasvæði félagsins út fyrir Húsavík. Árið 2010 var svo nafninu breytt í Húsavíkurstofa.

Það ár opnaði félagið upplýsingamiðstöð í austurenda Hvalasafnsins. Félagið starfrækti opna skrifstofu og sá meðal annarra verkefna um rekstur á tjaldsvæðinu á Húsavík og Mærudögum auk fyrrnefndrar upplýsingamiðstöðvar.

Á 15 árum hefur margt breyst og nú horfir stjórn félagsins til aukins drifkrafts í beinni markaðssetningu með auglýsingaherferðum og vinnu á samfélagsmiðlum auk greinargóðrar heimasíðu. Félaginu ber að vera markaðsafl fyrst og fremst með auga fyrir tækifærunum sem liggja í nærhéraði og að styðja við og efla ferðaþjónustu á svæðinu.

Nafnið Markþing er mun betur til þess fallið að endurspegla tilgang félagsins heldur en núverandi nafn sem tilheyrir öðrum tíðaranda.“

Á fundinum sköpuðust góðar umræður um verkefni félagsins. Rætt var meðal annars um auglýsingamyndbandið „Húsavík Welcomes Manchester“, sem framleitt var síðastliðið haust í tilefni af nýrri flugleið EasyJet til Akureyrar. Verkefnið þótti takast vel og naut góðrar dreifingar. Almennur vilji var meðal félagsmanna til að auka fjárveitingar til sambærilegra verkefna, sem og annarra almennra markaðsverkefna. Markþing mun áfram standa vörð um hagsmuni fyrirtækja í ferðaþjónustu og verslun á Húsavík og nágrenni.

Ný stjórn Markþings var kjörin á fundinum. Aðalstjórn skipa Benedikt Þorri Sigurjónsson, Daniel Chandrachur Annisius, Eiður Pétursson, Heiðar Hrafn Halldórsson, Helga Björg Sigurðardóttir og Sólveig Ása Arnarsdóttir. Varastjórn skipa Erika Lind Isaksen, Gunnar Jóhannesson og Ingibjörg Benediktsdóttir. 

Aðalstjórn Markþings. Fv. Daniel Chandrachur Annisius, Helga Björg Sigurðardóttir, Eiður Pétursson, Heiðar Hrafn Halldórsson og Benedikt Þorri Sigurjónsson. Á myndina vantar Sólveigu Ásu Arnarsdóttur.