HMS úthlutar byggðarframlagi í fyrsta sinn

Í tilkynningu segir að þetta sé í fyrsta sinn sem byggðarframlagi er úthlutað en því er ætlað að styðja við uppbyggingu á svæðum þar sem skortur er á leiguhúsnæði og bygging nýrra íbúða hefur verið í lágmarki vegna þess að byggingarkostnaður er hærri en markaðsvirði fasteignanna. Verkefnin sem fengu úthlutað byggðaframlagi snúa meðal annars að uppbyggingu leiguhúsnæðis fyrir einstaklinga undir tekju- og eignamörkum og annarra sértækra húsnæðisúrræða sveitarfélaga. 

Verkefnin sem fengu úthlutað eru í Norðurþingi, Reykhólahreppi, Snæfellsbæ, Skagafirði, Strandabyggð, Vesturbyggð og á Seyðisfirði. 

Byggðarframlögin voru hluti af úthlutun HMS til byggingar og kaupa á 600 hagkvæmum leiguíbúðum víðsvegar um landið, svokölluðum almennum íbúðum. Alls nema stofnframlögin og byggðarframlagið 3,6 milljörðum króna.

Báðar úthlutanirnar eru liður í áætlunum stjórnvalda um að efla uppbyggingu húsnæðis á landsbyggðinni og slá á þann mikla húsnæðisvanda sem lægri og millitekjuhópar hafa mátt stríða við undanfarin ár. Fólk sem leigir íbúð í kerfinu þarf ekki að verja jafn stórum hluta af ráðstöfunartekjum heimilisins til húsnæðis og það myndi í mörgum tilfellum gera á frjálsa leigumarkaðnum og býr við meira öryggi því ekki er hægt að segja upp leigunni nema að ýmsum skilyrðum uppfylltum. 

Nýtt lagaákvæði heimilar styrki til byggingarverkefna á landsbyggðinni

Heimild til að úthluta sérstökum byggðarframlögum var veitt með breytingu á lögum um almennar íbúðir í desember síðastliðnum. Ákveðið var að ráðast í breytinguna í kjölfar landsbyggðarverkefnis HMS og nokkurra sveitarfélaga á landsbyggðinni sem örvaði uppbyggingu á þeim svæðum sem það tók til. Það er HMS sem metur þörf og ákvarðar fjárhæð byggðarframlagsins sem tekur m.a. mið af markaðsaðstæðum á hverjum stað. 

Anna Guðmunda Ingvarsdóttir, aðstoðarforstjóri HMS: "Mikil stöðnun hefur verið í húsnæðismálum víða um land, þar sem lítið og víða jafnvel ekkert hefur verið byggt á síðustu árum. Erfið fjármögnun og misvægi milli húsnæðisverðs og byggingarkostnaðar hefur valdið þessu en byggðarframlögin eru einmitt ætluð til að bæta úr þeirri stöðu. 

Við fórum af stað með landsbyggðarverkefnið til að bregðast við húsnæðisvanda á landsbyggðinni og örva uppbyggingu á þeim svæðum sem verkefnið tók til. Á grundvelli reynslunnar af landsbyggðarverkefninu var bætt við lögin að HMS gæti veitt sérstök byggðarframlög þar sem skilyrði á markaði réttlæta slíkan stuðning. Byggðarframlögin eru ofan á stofnframlög sem eru veitt til byggingar á hagkvæmu húsnæði fyrir lægri og millitekjuhópa og jafna þannig möguleika landsbyggðarinnar á að njóta þess stuðnings sem ríki og sveitarfélög hafa veitt síðustu ár. "