Hjóladeildin á miklu skriði

Gunnólfur Sveinsson og Aðalgeir Sævar Óskarsson.

Á samkomu Völsungs í vikunni var Hjóladeild félagsins færð viðurkenning fyrir öflugt uppbyggingarstarf á undanförnum árum.

Deildin hefur komið af miklum krafti inn í starfsemi félagsins og byggt upp hjólastíga sem opnir eru almenningi. 

Í umsögn segir:

Árið 2018 tóku áhugamenn sig saman með hugmynd að hjólabraut. Vel var tekið í verkefnið og fékkst leyfi til að gera braut frá Reykjaheiði niður að Botnsvatni. Sumarið 2019 var hafist handa og tóku framkvæmdir tvö sumur. Viðtökur við brautinni voru mjög jákvæðar og kviknuðu þá hugmyndir um að halda áfram með þessa framkvæmd og koma brautinni alla leið niður í bæ. Sú vinna kláraðis sumarið 2021. 

Árið 2022 réðst deildin svo í að gera stíg frá Botnsvatni, upp í gegnum skógræktina og uppá Reykjaheiði, stígur sem eru opinn öllum þeim sem vilja nýta sér svæðið til útivistar og verður vonandi áframhald á því verkefni svo gera megi stærra svæði aðgengilegt almenningi.

Deildin er áfram stórhuga og hefur fengið úthlutað svæði í stölunum sem er ætlað fyrir æfingasvæði, aðallega fyrir börn og ungmenni. Frumhönnun á því svæði fór fram 2022 og er stefnt að því að fyrsti partur þess svæðis verði tilbúinn á árinu 2023. Talið er að þessar framkvæmdir geti tekið tvö til þrjú ár.

Það er mikilvægt hverju íþróttafélagi að vera með öfluga sjálfboðaliða, fólk sem brennur fyrir starfi félagsins. Hér á Húsavík erum við svo heppinn að hafa hóp af fólki sem brennur fyrir íþróttafélagið og sér til þess að í boði er öflugt og fjölbreytt íþróttastarf fyrir alla aldurshópa. Hjóladeildin er einmitt dæmi um slíkt starf.

Gunnólfur Sveinsson og Aðalgeir Sævar Óskarsson tóku við viðurkenningu Hjóladeildar Völsungs.