Helga Dögg ráðin útibússtjóri Íslandsbanka

Helga Dögg Aðalsteinsdóttir.

Helga Dögg Aðalsteinsdóttir hefur verið ráðin í starf útibússtjóra Íslandsbanka á Húsavík.

Hún tekur við starfinu í lok október af Margréti Hólm Valsdóttur sem nýverið var ráðin til starfa hjá Þingeyjarsveit í nýtt starf sviðsstjóra fjármála- og stjórnsýslusviðs.

Helga Dögg er viðskiptafræðingur að mennt og með M.Sc. í fjármálum fyrirtækja frá Háskóla Íslands. Hún hefur verið þjónustustjóri Sparisjóðs Suður-Þingeyinga á Húsavík frá árinu 2018 ásamt því að gegna stöðu staðgengils sparisjóðsstjóra.

Áður en hún réðist til starfa hjá sparisjóðnum, starfaði hún hjá Íslandsbanka á höfuðborgarsvæðinu 2013 - 2018 og gegndi þar stöðu ráðgjafa einstaklinga. Á námsárunum vann hún hjá Sparisjóði Suður-Þingeyinga, SPRON á Seltjarnarnesi og Íslandsbanka Húsavík. 

Helga Dögg er fædd og uppalin á Húsavík og á tvo syni sem fæddir eru 2010 og 2013 og tvo stjúpsyni sem fæddir eru 2007 og 2009.