Guðrún Þóra og Elvar Baldvins Íþróttafólk Völsungs 2020

Kosningu lauk um nýliðna helgi og voru úrslit kunngjörð í vallarhúsinu við látlausa athöfn í gær þar sem verðlaunahafar voru viðstaddir.

 

Í kjöri voru eftirtaldir aðilar:

- Anna María Bjarnadóttir boccia

- Arney Kjartansdóttir blak

- Ágúst Sigurður Óskarsson almenningsíþróttir, langhlaup

- Ásgrímur Sigurðsson boccia

- Elvar Baldvinsson knattspyrna

- Guðrún Þóra Geirsdóttir knattspyrna

- Hjalti Karl Jónsson blak

 

 

Hún gríðarlega öflug og efnileg knattspyrnukona. Þrátt fyrir að vera eingöngu 16 ára gömul er Guðrún Þóra orðin einn af lykilmönnum Völsungs í knattspyrnu. Hún er frábær liðsmaður, bæði innan vallar sem utan, leggur sig ávallt fram og gerir miklar kröfur til sín og samherja sinna.

 

Guðrún Þóra spilaði alla leiki meistaraflokks kvenna sumarið 2020 og leysti margar stöður á vellinum enda gríðarlega fjölhæfur leikmaður. Hún var markahæsti leikmaður meistaraflokks kvenna sumarið 2020 og fékk atkvæði í vali á liði ársins í Lengjudeildinni sem valið er af þjálfurum og fyrirliðum.

 

Guðrún Þóra æfði með U-17 landsliðinu áður en öllum verkefnum þar var aflýst vegna heimsfaraldurs.

 

Elvar Baldvinsson gekk aftur til liðs við Völsung á vordögum eftir að hafa spilað með Þór framan af ári. Hann spilaði stöðu sem hann hefur ekki mikið leikið áður, í hjarta varnarinnar og tók aukna ábyrgð sem einn af eldri leikmönnum liðsins.

 

Elvar spilaði fantavel og var að lokum kosinn „Besti leikmaður ársins“ af liðsfélögum sínum og þjálfurum. Elvar spilaði 19 leiki í 2. deild og skoraði í þeim þrjú mörk.

 

 

Ágúst átti gott hlaupaár og lét Covid 19 ekki stoppa sig í að halda uppi reglubundum æfingum. Þrátt fyrir heimsástandið og takmarkað keppnishald tókst Ágústi að fara nokkrum sinnum í keppnisgallann.

 

Hann náði góðum árangri í 5 km götuhlaupi í Hafnafirði og 10 km hlaupi Powerade í janúar. Ágúst náði einnig að hlaupa tvö hálfmaraþon í Reykjavík og náði best tímanum 1:42:51.

 

Á æfingum er hann óþreytandi og fer aldrei heim fyrr en að síðasti einstaklingurinn er búinn að gefast upp. Hann hefur sýnt mikið frumkvæði af því að skipuleggja æfingar fyrir hlaupahópinn og metnað við að leiðbeina nýjum iðkendum til gagns í hlaupasportinu. Ágúst er mikil fyrirmynd og verðskuldaður langhlaupari ársins 2020.

 

 

Hjalti Karl er blakkarl Völsungs 2020. Hjalti Karl hefur stundað blak frá unga aldri og ekkert lát var á síðasta tímabil áhugi hans og dugnaður er örðum til eftirbreytni og eftir að framhaldskólar lokuðu nú á haustönnvar hann fljótur að melda sig inn og byrja að æfa með sínum félögum.

 

Hjalti spilaði með mjög svo ungu liði Völsungs í deildarkeppni á síðasta tímabil og stóð sig eins og hetja þar og lét aldrei bilbug á sér finna þó svo að á stundum hafi verið á brattan að sækja.

 

 

Arney Kjartansdóttir er blakkona Völsungs 2020. Arney er fjölhæf og öflug blakkona sem getur leyst allar stöður á vellinum. Hún er drífandi og röggsöm á velli og leggur sig ávallt fram um að skila sínu hlutverki sem allra best.

 

Arney hefur leikið með yngri landsliðum Íslands í blaki og gegnir hlutverki sem fyrirliði Meistaraflokksliðs Völsungs í 1 deild þessi misserin.

 

 

Ásgrímur er öflugur bocciaspilari, hann hefur æft og spilað með Völsungi til fjölda ára. Dugnaður, ástundun og áhugi með einsdæmum, en öll árin hefur hann mætt nánast á allar æfingar þó hann þurfi að sækja æfingar um 150 km leið.

 

Árið 2020 var afar óvenjulegt íþróttaár vegna Kóronaveirunnar, æfingar stopular og öllum helstu mótum ársins, eins og Íslandsmótum, aflýst.

 

Á landsvísu er Ásgrímur í 1.deild, bæði sem einstaklingur og í A-sveit Völsungs, og hefur því skipað sér í hóp bestu Bocciamanna landsins og verið í hópi þeirra nú til margra ára.

 

Þrátt fyrir þetta furðulega íþróttaár, er áhugi og ástundun Ásgríms óbilandi og hann áfram öflugur liðsmaður í góðum hópi fatlaðs íþróttafólks hjá Völsungi.

 

 

Anna María er góður og áhugasamur bocciaspilari, hefur æft og spilað með Völsungi til fjölda ára. Dugnaður, ástundun og áhugi mikill, öll árin hefur hún mætt nánast á allar æfingar og aldrei gefið eftir við æfingar og keppni.

Árið 2020 var afar óvenjulegt íþróttaár vegna Kóronaveirunnar, æfingar legið niðri lengst af og öllum helstu mótum ársins, eins og Íslandsmótum, aflýst.

 

Á síðasta ári vann Anna María sér keppnisrétt í 1. deild, sem er nýr áfangi hjá henni og mikil áskorun að vera komin í hóp þeirra bestu og keppa að því að halda sér þar!

 

Þrátt fyrir þetta furðulega íþrótta ár, er áhugi og ástundun Önnu Maríu óbilandi og hún áfram öflugur liðsmaður í góðum hópi fatlaðs íþróttafólks hjá Völsungi.