Guðrún lætur af störfum sem formaður Völsungs

Guðrún fékk blóm og gjafabréf frá Völsungi.

Guðrún Kristinsdóttir sem hefur sinnt formennsku íþróttafélaginu Völsungi síðan 2011 og lét af störfum í gær á auka aðalfundi félagsins.

Samþykkt var á  aðalfundi Völsungs 28. júní síðastliðinn að boða til auka aðalfundar fimmtudaginn 13. september þar sem fram færi kosning formanns aðalstjórnar Völsungs. Fundurinn var haldinn í gær, fimmtudag, og var ágætis mæting. 

Í tilkynningu segir að aðalstjórn Völsungs hafir leitað að einstaklingi í formannsstólinn og sú leit hafi ekki borið árangur enn sem komið er. Af þeim sökum var samþykkt eftirfarandi tillaga með öllum greiddum atkvæðum:

• Þar sem enginn hefur boðið sig fram til formennsku í Íþróttafélaginu Völsungi leggur aðalstjórn til að hún fái umboð til að finna sér formann. Framkvæmdastjóri sinni störfum formanns þar til aðalstjórn Völsungs skipar sér varaformann. Því skuli lokið fyrir 1. október 2018.