Guðrún Kristinsdóttir sæmd gullmerki Völsungs

Á samkomu Völsungs sem fram fór í Hlyn sl. fimmtudag var Guðrún Kristinsdóttir fv. formaður Völsungs sæmd gullmerki félagsins.

Gullmerki Völsungs er veitt fyrir frábær störf í þágu félagsins en þó aldrei fyrr en eftir 25 ára starf.

Lilja Friðriksdóttir varaformaður Völsungs heiðrar hér Guðrúnu með gullmerki félagsins.

Í umsögn sagði:

Guðrún tók fyrst að sér verkefni fyrir Völsung sumarið 1980 þegar hún stjórnaði fyrsta leikjanámskeiði Völsungs á Húsavík í samstarfi við Vinnuskóla Húsavíkurbæjar. Guðrún flutti til Húsavíkur og settist að árið 1986, ásamt eiginmanni sínum og var ráðinn sem íþróttakennari við Borgarhólsskóla. Fljótlega uppúr því stofnaði Guðrún fimleikadeildina, eða árið 1987, og var þjálfari og formaður deildarinnar í 20 ár.  

Árið 1992  var hún frumkvöðull í að bjóða leikskólabörnum upp á tíma í fimleikum einu sinni í viku til reynslu.  Mjög mikill áhugi reyndist fyrir þessum tímum og var ákveðið í framhaldinu að bjóða upp á sérstakan íþróttaskóla á laugardögum frá haustinu 1993. Guðrún var kennari við íþróttaskóla Völsungs í fjölda mörg ár. Má því segja að íþróttaskólinn hafi starfað óslitið frá þessum tíma til dagsins í dag þó svo að sniðið á honum hafi breyst í gegnum tíðina. Starf íþróttaskólans er því að verða 30 ára.

Guðrún starfaði sem sjálfboðalið innan knattspyrndeildar og sinnti ýmsum fjölbreyttum verkefnum þar þegar eiginmaður hennar, Ingólfur Freysson var framkvæmdarstjóri og formaður deildarinnar og síðar formaður Völsungs

Guðrún varð formaður Völsungs 2011 og var formaður til ársins 2018, eða í alls sjö ár. Í formannstíð hennar tók hún til hendinni og stjórnaði félaginu af festu og röggsemi. Hún vann m.a. að því að gera Völsung að fyrirmyndarfélagi ÍSÍ og elfdi samstarf á milli deilda félagsins með reglulegum fundum formann deildanna.  Þá leiddi hún félagið í gegnum mjög erfiða fjárhagsstöðu til jákvæðra niðurstöðu.

Þá stjórnaði Guðrún Kvennahlaupi ÍSÍ í 15 ár og hún hefur jafnframt verið með leikfimi fyrir konur á öllum aldri í 35 ár.  Guðrún er enn í dag að  sinna heilsurækt þar sem hún er með leikimi fyrir eldri borgara á Húsavík í Íþróttahöllinni.

Einkenni Guðrúnar sem formaður var hversu vel hún hélt utan um skipulag og fjármál félagsins. 

Guðrúnu er umhugað um félagið og hve mikilvægu hlutverki það gegnir í samfélagi okkar.

Guðrún Kristinsdóttir.