Guðlaug Gísladóttir: Sjúkratryggingar hætti að niðugreiða komugjöld til sjálfstætt starfandi lækna

Í fljótu bragði virðist þessi tillaga hljóma galin, en aukning kostnaðar í heilbrigðismálum sýnist oftar en ekki galinn. Hér að neðan má sjá aukningu í útgjöldum ríkisins vegna heilbrigðismála í nokkrum málaflokkum á sjö ára tímabili frá 2002-2009:

Brýn læknismeðferð erlendis: útgjöld jukust um tæpar 1.300 milljónir - 300% aukning

Hjálpartæki: útjgöld jukust um rúmar 1.600 milljónir - 150% aukning

Þjálfun: útgjöld jukust um tæpa 1.200 milljónir - 130% aukning

Læknishjálp: útgjöld jukust um tæpar 3.200 milljónir - 111% aukning

Lyf: útgjöld jukust um rúmar 5.300 milljónir - 97% aukning

Heilbrigðisstofnun Þingeyinga: útgjöld hafa vaxið um tæpar 250 milljónir - 37% aukning

Af ofangreindum tölum má sjá að útgjöld ríkisins varðandi læknishjálp (sem eru niðurgreiðslur ríkisins í komugjöldum til sjálfstætt starfandi lækna) hafa aukist um 3.200 milljónir eða 111% á síðastliðnum sjö árum. Á sama tíma hefur kostnaður vegna Heilbrigðisstofnunar Þingeyinga, sem þjónar rúmlega 5000 manna svæði, vaxið um aðeins 250 milljónir. Útgjöld ríkisins til Heilbrigðisstofnunar Þingeyinga hafa staðið í stað frá árinu 2008 á meðan þau hafa vaxið enn frekar í mörgum öðrum málaflokkum. Í fjárlögum 2011 er ætlunin að skerða fjárframlög til stofnunarinnar um 40% eða 368 milljónir. Það nemur tæpum 13% af heildarskerðingu til heilbrigðismála á Íslandi, hjá stofnun sem fékk minna en 1% af fjárveitingu ríkisins til heilbrigðismála árið 2010.

Ef þessi niðurskurður gengur eftir mun sjúkradeild Heilbrigðisstofnunar Þingeyinga leggjast af og hátt í 70 manns missa vinnuna. Um 5% starfa á Húsavík munu leggjast af. Auk þess að vega harkalega að grunnþjónustu á svæðinu, mun þessi aðgerð ein og sér valda óbætanlegu tjóni í byggða- og atvinnumálum í Þingeyjarsýslum. Ofangreindar tölur sýna með óyggjandi hætti að Heilbrigðisstofnun Þingeyinga er ekki orsakavaldur óhóflegar hækkunar í útgjöldum ríkisins til heilbrigðismála, og því getur lausnin á þeim vanda ekki verið að skera fyrst og fremst niður starfsemi Heilbrigðisstofnunar Þingeyinga. Fjárlagafrumvarpið gerir ráð fyrir 97.611 milljónum króna til heilbrigðismála árið 2011. Árið 2010 er fjárveiting til Heilbrigðisstofnunar Þingeyinga 926 milljónir króna, eða innan við eitt prósent. Samt sem áður á stofnunin að bera tæp 13% af niðurskurði til allra heilbrigðismála á Íslandi. Það er von að Þingeyingar spyrji hvað Heilbrigðismálaráðuneytinu gangi til.

Í upphafi skal endinn skoða. Heilbrigðisstofnun Þingeyinga er ekki hluti af vanda fjárlagahalla ríkissjóðs. Stofnunin sinnir grunnþjónustu á sviði heilbrigðismála á hagkvæman og skilvirkan máta. Stofnunin er jafnframt stærsti vinnustaðurinn í Þingeyjarsýslu og ein af máttarstoðum samfélagsins. Það er satt að segja „galið“ að með fjárlögum 2011 eigi að kippa fótunum undan Heilbrigðisstofnun Þingeyinga og samfélaginu hér, það bjargar engu. Á meðan kostnaður við Heilbrigðisstofnun Þingeyinga lækkaði á milli áranna 2008 og 2009, jókst kostnaður ríkisins vegna lyfjamála um tæpar 1.500 milljónir; vegna læknishjálpar um rúmar 1.100 milljónir; vegna hjálpartækja um rúmar 600 milljónir og vegna læknismeðferðar erlendis um rúmar 600 milljónir. Ég skora á alla þingmenn landsins og ráðherra að hafna fyrirhugðum niðurskurði til Heilbrigðisstofnunar Þingeyinga og standa frekar vörð um fyrirmyndarstofnun á sviði reksturs og þjónustu. Ekki hengja bakara fyrir smið.

Aukning kostnaðar á milli áranna 2002 og 2009 í nokkrum málaflokkum á sviði heilbrigðismála.

 

Málaflokkur	2002/mkr	2009/mkr	Aukning í mkr	Aukning í %
Læknishjálp	2.860	6.037	3.177	111%
Lyfjakostnaður	5.441	10.743	5.302	97%
Hjálpartæki	1.108	2.766	1.658	150%
Þjálfun	968	2.224	1.256	130%
Brýn læknismeðferð erelndis	418	1.689	1.271	304%
Heilbrigðisstofnun Þingeyinga	670	921	251	37%

Tölulegar heimildir fengnar úr reikningum Sjúkratrygginga Íslands og Heilbrigðisstofnunar Þingeyinga

 

Aukning kostnaðar á milli áranna 2008 og 2009 í nokkrum málaflokkum á sviði heilbrigðismála.

Málaflokkur	2008/mkr	2009/mkr	Aukning í mkr	Aukning í %
Lækniskostnaður	4.925	6.037	1.112	23%
Lyfjakostnaður	9.287	10.743	1.456	16%
Hjálpartæki	2.129	2.766	637	30%
Þjálfun	1.872	2.224	352	19%
Brýn læknismeðferð erlendis	1.061	1.689	628	59%
Heilbrigðisstofnun Þingeyinga	928	921	-7	-1%

Tölulegar heimildir fengnar úr reikningum Sjúkratrygginga Íslands og Heilbrigðisstofnunar Þingeyinga

 

Höfundur greinar:

Guðlaug Gísladóttir, verkefnisstjóri

gulla@hac.is

 

[1]Samkvæmt reikningum Sjúkratrygginga Íslands var kostnaður við læknishjálp árið 2009 um 6.037 milljónir.