Fuglalíf á vöktunarsvæði Gaums

Himbrimi. Lj. Hreinn Hjartarson.

Í liðinni viku voru uppfærð gögn um fuglalíf  á vöktunarsvæði Gaums. Að þessu sinni náði uppfærslan til vetrarfuglatalningar 2020 og vatnafuglatalningar 2021 á öðrum svæðum en á og við Mývatn. 

Vetarfuglatalning fer fram undir stjórn Náttúrufræðistofnunar. Vetarfuglatalningin er langtíma vöktunarverkefni sem hefur staðið frá árinu 1952 og er eitt lengsta samfellda vöktunarverkefni á landinu skv. upplýsingum á vef Náttúrfræðistofnunar. Talningin byggir á þátttöku sjálfboðaliða og fer fram í kringum áramót ár hvert.

Vatnafuglar eru taldir tvisvar á sumri á tilteknum svæðum. Náttúrustofa Norðausturlands sér um talningu utan Mývatns, Laxár, Svartár og svartárvatns. Markmiðið er að fylgjast með þróun vatnafuglastofna. Fylgst er með vatnafuglastofnum í Ljósavatnsskarði, Reykjadal og Aðaldal á vöktunarsvæði Gaums. 

Helstu breytingar varðandi vetrarfugla er að meira var af hávellu, æðarfugli, sendlingi og snjótitlingum árið 2020 en 2019 en þó ekki meira en oft áður á vöktunartíma Gaums. 

Varðandi vatnafugla er helst að sjá að himbrimum virðist vera að fjölga á svæðinu, ekki bara á milli ára heldur einnig yfir tímabilið sem Gaumur hefur fylgst með. Himbrimar hafa verið á bilinu 8-11 lengst af en á árinu 2021 voru þeir 17 eða tvöfalt fleiri en árið 2011. 

Lesa má nánar í vísi 2.