Friðrik Sigurðsson: Ágæti þingmaður

En á dauða mínum átti ég von að það kæmi til þess að ég þyrfti að skrifa ykkur bréf og kvarta yfir því að stjórnvöld hyggðust segja Þingeyingum stríð á hendur. Það er ekkert annað en stríðsyfirlýsing við íbúa hér að ætla að taka 85% af fjármagni frá sjúkradeild Heilbrigðisstofnunar Þingeyinga.

Ég geri mér grein fyrir því, að með aðgangi að góðu Þingeysku lofti eru allar líkur á því að við verðum allra manna heilbrigðust á landinu góða en að halda að fólk á svæðinu hætti að verða sjúkt er fráleitt?  Því er okkur Þingeyingum ætlað að taka á okkur 9% af skerðingu í heilbrigðisþjónustu?

• Ég hvet ykkur til að kíkja á landakortið og sjá hvað starfssvæði HÞ er stórt.
• Er ykkur ekki ljóst hvaða vegalengdir er um að ræða á starfssvæði HÞ t.d. frá Þórshöfn til Húsavíkur? 
• Er ykkur ljóst hvaða áhrif þetta hefur á samfélagið í Þingeyjarsýslu.  Þetta jafngildir því að 2.500 manns væri sagt upp á einu bretti í Reykjavík
• Samkvæmt framkomnum upplýsingum var bent á það að nauðsynlegt væri að hafa eitt varasjúkrahús í nágrenni Reykjavíkur, ef þið eruð samkvæmir sjálfum ykkur með þetta þá þarf að sjálfsögðu að vera varasjúkrahús fyrir Akureyri
• Samgöngur til Akureyrar eru ekki opnar alla daga ársins vegna veðurs eiga þá sjúklingar bara að deyja veðurtepptir á leiðinni á sjúkrahús þar?

Ég hef ekki séð rökin fyrir því að þessar snargölnu hugmyndir komi til með að spara fjármagn úr ríkissjóði Íslands, sjóði sem ég greiði í til jafns við aðra þegna landsins. Hvernig dettur ykkur í hug að hægt sé að halda úti starfsemi með 15% af því fjármagni sem áður var til sama rekstrar, rekstrar sem hefur verið í stanslausum sparnaði og aðhaldi síðastliðin 10-15 ár. Ef einhver ykkar hafa komið nálægt rekstri fyrirtækja þá ætti ykkur að vera ljóst að fastur kostnaður við rekstur er alltaf meiri en 15% ALLTAF!  Það eru því bara fíflalæti að láta frá sér hugmyndir sem bjóða okkur Þingeyingum upp á að reka sjúkrahúshlutann á 15% af núverandi framlagi til reksturs.  

Ég ítreka skoðun mína frá því í júní að ykkur ber að standa vörð um grunnþætti í íslensku samfélagi sem eru að standa vörð heilbrigðisþjónustuna og öryggismál borgarana.
Þetta eru lykilatriðin í okkar samfélagi ásamt því að tryggja menntun þjóðarinnar. 

Ég legg því allt mitt traust á fjárlaganefnd Alþingis að hún leiðrétti þann órétt sem við Þingeyingar erum beittir í framlögðu fjárlagafrumvarpi. 
Við erum að sjálfsögðu til viðræðu um að hagræða og leita allra leiða til að spara í rekstri ríkissjóðs.

Ég reikna að sjálfsögðu með því að fá svör frá ykkur öllum um þetta alvarlega mál sem fyrir ykkur er lagt hér í þessum tölvupósti.

Virðingarfyllst, 
Friðrik Sigurðsson
Höfðavegi 5
640 Húsavík

Erindi þetta var sent á fjárlaganefnd Alþingis í gær ásamt afriti á fjármálaráherra og velferðarráðherra