Frábær árangur Öxarfjarðarskóla í Samrómi

Samrómur er spennandi verkefni þar sem unnið er að því að safna upptökum af lestri sem notaðar verða til að kenna tölvum og tækjum að skilja íslensku.

Á heimasíðu Norðurþings segir að verkefnið sé á vegum Almannaróms, sem hefur það að markmiði að tryggja máltæknilausnir fyrir íslensku, Deloiette, Háskóla Reykjavíkur og Nýsköpunar-sjóð námsmanna.

Með þessu sameiginlega átaki verður hægt að skapa gagnasafn íslenskunnar sem mun standa með tækniþróun í framtíðinni.

Lestrarkeppni grunnskóla stóð yfir frá 20. - 26. janúar. Markmið keppninnar var að
hvetja ungt fólk til þáttöku í verkefninu Samrómi. Öxarfjarðarskóli tók þátt með framúrskarandi árangri!

Hrund Ásgeirsdóttir, skólastjóri í Öxarfjarðarskóla, sagði að nemendur hafi sýnt keppninni mikinn áhuga enda var til mikils að vinna, í verðlaun var þrívíddar prentari fyrir sigurhæsta liðið. Í liði Öxarfjarðarskóla voru 285 manns sem samanstóð af nemendum, starfsfólki skólans, fjölskyldum og vinum. Liðið las samtals 147.189 setningar sem gera 5661 setningu á nemanda og hafnaði í 2. sæti í sínum flokki á eftir Höfðaskóla sem tók  fyrsta sætið með 153.288 setningar eða 2189 setningar á nemanda. Öxarfjarðarskóli hafnaði í 4. sæti á landsvísu þegar allir flokkar eru taldir með.

Hrund var himinsæl með árangur skólans:
"Þetta sýnir okkur hvað samhugurinn getur gert mikið; baráttuandi, samvinna og liðsheild. Það er umfram allt hugarfarið sem skiptir máli og liðsandinn. Að vilja ná langt og gera vel – alveg sama hvað við tökum að okkur. Það sem ekki er síður mikilvægt, er hversu vel samfélagið allt tók þátt í þessu með okkur, foreldrar, systkini, starfsfólk, ömmur, afar, frændfólk og vinir og velunnarar. Verkefni sem þetta kennir okkur að standa saman og sýnir hvernig best vinna það; með gleði, opnum huga, baráttu og umfram allt eins og eitt lið. Það þjappar okkur enn frekar saman."

Fyrir framúrskarandi árangur fær Öxarfjarðarskóli aukaverðlaun og fer verðlaunaafhendingin fram á Bessastöðum þann 8.febrúar næstkomandi.

Hrund Ásgeirsdóttir tók saman smá pistil um gengi Öxarfjarðarskóla og hér má lesa hann í heild sinni.