Frá forseta sveitarstjórnar Norðurþings - 100 dagar

Friðrik Sigurðsson.

Fyrstu eitt hundrað dagana frá því að nýr meirihluti tók við í sveitarstjórn þann 15. júní s.l. hefur margt á daga sveitar-félagsins drifið.

Sveitarstjóraskipti

Fyrst ber að nefna ráðningu nýs sveitarstjóra Kristjáns Þórs Magnússonar sem mörgum íbúum er vel kunnur.

Kristjáni Þór fylgir ferskur blær með nýjum áherslum sem íbúar eiga vonandi eftir að upplifa og þá vonandi í enn betri þjónustu sveitarfélagsins.

Bakki & PCC

Iðnaðaruppbygging á Bakka hefur tekið umtalsvert lengri tíma en nokkur hefði órað fyrir. Ástæður þess eru vissulega margþættar, þó er ein skýr ástæða ekki til staðar, en það er vinna sveitarfélagsins og starfsmanna þess við undirbúningin.  Þar hafa allir starfsmenn lagst á eitt og tryggt að ekki hefur hermt upp á sveitarfélagið í samningaferli við PCC og samskiptum við ríkisstofnanir vegna vegarlagningar og hafnarstækkunar.   Eftir að mín beinu afskipti hófust af samskiptum við PCC get ég staðfest að þar er á ferðinni vandað fólk sem vinnur faglega vinnu og undirbúning verkefnisins af sinni hálfu.  Ég hlakka til þess að fá þetta fyrirtæki í fullan rekstur í samfélaginu okkar.

Leikskóli á Kópaskeri

Nýr meirihluti tók um það ákvörðun í sumar að rekin yrði leikskóladeild í skólahúsinu á Kópaskeri. Vonandi verður það gott innlegg í íbúaþróun í kauptúninu.

Endurnýjun búnaðar í skólum sveitarfélagsins

Nýr meirihluti hefur kallað eftir þörfum skóla sveitarfélagsins á grunnbúnaði og undirbýr það verkefni í fjárhagsáætlun fyrir árið 2015

Sorpmál

Undanfarin ár hefur legið fyrir að rekstrargrundvöllur fyrir sorpbrennslu á Húsavík var algjörlega brostinn.  Orsakirnar má bæði rekja til tækjabúnaðar stöðvarinnar og einnig í ljósi þess að ríkisvaldið létti á kröfum um það sem yrði að brenna og heimilaði urðun.  Urðun er og verður alltaf mun ódýrari en brennsla en að sama skapi er hún ekki á nokkurn hátt varanleg lausn á úrgangsmálum og frestar bara vandamálinu til komandi kynslóða.

Í sumarbyrjun óskuðu fulltrúar Skútustaðahrepps og Þingeyjarsveitar eftir því að samstarfi sveitarfélagana í Sorpsamlagi Þingeyinga ehf yrði slitið og urðu meðeigendurnir, Norðurþing og Tjörneshreppur við þeirri ósk.  Nú liggur fyrir að rekstri félagsins verður hætt um n.k. áramót og er í undirbúningi að Norðurþing taki sjálft við sorphirðu og umsjón með förgun.  Væntanlega verður verkið boðið út, þ.e. sorphirðing á Húsavík og í Reykjahverfi og sorpförgun, sem a.m.k. fyrst um sinn verður með þeim hætti að ekið verður með sorpið áfram til förgunar við Blönduós.   Unnið verður að því í vetur að taka upp frekari sorpflokkun hjá íbúum og er gert ráð fyrir því að notað verði þriggja íláta kerfi.  Þetta verður kynnt nánar þegar nær dregur. Með frekari flokkun verður hægt að búa til frekari verðmæti úr því sorpi sem til fellur hjá okkur og einnig minnkar það það magn sem þarf að fara með í förgun.  Íbúar þurfa því ekki að óttast að ekki verði áfram fjarlægt sorp frá íbúðarhúsum og áfram verður rekin móttökustöð á Húsavík.

Samskipti við ríkisvaldið

Það hefur ekki farið framhjá nokkrum íbúa að ríkisvaldið virðist vinna markvist að því að fækka stofnunum og útibúum um alla landsbyggðina á kostnað þjónustu, fjölbreytileika og öryggis heimamanna.

Ég hef núna á stuttum tíma setið bæði landsþing sambands íslenskra sveitarfélaga og ársfund Eyþings þar sem fulltrúar frá ríkisvaldinu hömruðu þetta járn og ég upplifi það að enn sé stefnt að því að fækka svo ekki þurfi að leggja það á ráðuneytin í Reykjavík að tala við of marga um rekstur samfélaganna á landsbyggðinni.

Því miður er það svo að aðal samskipti fulltrúa í sveitarstjórnum við ríkisvaldið er að berjast fyrir því að halda því litla sem eftir er af þjónustu ríkissins í sveitarfélaginu.   Augljós þrýstingur er á að sameina t.d. Atvinnuþróunarfélag Þingeyinga og Atvinnuþróunarfélag Eyjafjarðar og efla hið svokallaða þriðja stjórnsýslustig með starfsemi Eyþings.  Ég hef varað við þessari þróun.

Bara núna síðsumars höfum við fengið tilkynningar um að loka eigi skrifstofu Vinnumálastofnunar á Húsavík,  Íslandspóstur hafi óskað eftir því að skerða þjónstu á austursvæði Norðurþings, starf lögreglustjóra hefur verið lagt niður og sameinað til Akureyrar, starf sýslumanns að sama skapi veikt með því að sameina það og gera að embætti fyrir allt norð-austurland.  Það veikir að mínu mati nærþjónustu okkar.  Þar sem svo virðist sem báðum þessum sameiningum fylgi ekki fjármagn í samræmi við núverandi fjárþörf.  Sama gildir um stofnun Heilbrigðisstofnunar Norðurlands sem við í sveitarstjórn höfum verið samstíga um að mótmæla.  Þrátt fyrir fögur fyrirheit er ekkert ljóst um efndir.    

Þó má segja að ekki er allt slæmt sem frá ríkinu hefur komið, góður stuðningur hefur verið við uppbyggingu á Bakka með fjárframlögum til hafnaruppbyggingar og vegagerðar og ber að þakka fyrir það.

Brotthvarf Vísis

Brotthvarf Vísis úr rekstri á Húsavík er gífurleg blóðtaka fyrir sveitarsjóð, samfélagið og ekki síst rekstur hafnarinnar á Húsavík.    Útsvarstekjur af starfsmönnum Vísis voru umtalsverðar en einnig gjöld til Húsavíkurhafnar, bæði af bátum Vísis en ekki síður af öðrum bátum sem hætt hafa að leggja upp á Húsavík.  Eftir kaup Norðlenska á húsnæði Vísis virðist stefna í það að hér í þessum gamalgróna útgerðarbæ verði ekki hægt að fá keyptan ís né að hægt verði að fá löndunarþjónustu.  Þetta er verulega slæmt og vona ég að einhverjir áhugasamir aðilar sjái í því tækifæri að veita þessa þjónustu áfram hér í bæ.  Rækjumiðin hér fyrir utan gera það að verkum að heppilegt er að landa á Húsavík en það getur reynst erfitt ef ekki er þjónusta til staðar. 

Það er von mín að Norðlenska muni nýta nýtt húsnæði sitt sem mest og þar verði mikil og öflug kjötvinnsla sem hugsanlega kemur að einhverju leiti í stað þeirra starfa sem töpuðust við brotthvarf Vísis. 

Sveitarstjórn óskaði eftir því í vor að fá formlegan fund með þingmönnum kjördæmisins um málefni Vísis og brotthvarf þeirra úr samfélaginu en því erindi var ekki svarað.  Við kynntum því málið  fyrir þingmönnum á árlegum kjördæmafundi sveitarstjórna með þeim í s.l. viku. 

Málefni eldriborgara

Sveitarfélögin í Þingeyjarsýslum reka saman Dvalarheimilið Hvamm sf sem upphaflega var stofnað til sem dvalarheimilis en er nú að stærstum hluta orðið hjúkrunarheimili sem er verkefni ríkisins.

Gott samstarf hefur verið milli Heilbrigðisstofnunar Þingeyinga og Hvamms um samrekstur undanfarin ár og hafa verið samræður um áframhald á því við hina nýju Heilbrigðisstofnun Norðurlands.   Ljóst er að mikil og aðkallandi þörf er á því að byggja við hjúkrunarrými á Húsavík og fjölga þeim um 20-30 rými sem allra fyrst.  Heilbrigðisráðherra er meðvitaður um þetta brýna mál og veit ég að við erum vonandi efst á blaði þegar kemur að því að byggja ný rými.

Sveitarstjórn vinnur nú að undirbúningi á stofnun öldungaráðs sem verður sveitarstjórn til ráðgjafar um málefni eldriborgara.

Fjármál

Alvarlega ber að taka fjárhagsstöðu sveitarfélagsins og alveg ljóst að ekki verður við unað.  Nauðsynlegt er að ná inn frekari tekjum. Að mínu mati verður það ekki gert með frekari hækkunum á þjónustugjöldum sem eru nú þegar í jafnvel flestum tilfellum með því hæsta sem gengur og gerist í landinu. 

Tekjurnar þurf að koma af nýsköpun í atvinnulífinu og frekari uppbyggingu hjá þeim sem fyrir eru.

Gjöld hafa verið skorin niður svo mikið að þegar talað er um að hafa skorið inn að beini þá erum við farin að naga beinin í dag.  Nýr meirihluti er þó ekki feiminn við að skoða allar leiðir til hagræðingar í rekstir ef það bitnar ekki á þjónustu við íbúa sveitarfélagsins.

Sala eigna sem ekki eru nýttar til reksturs sveitarfélagsins er einnig uppi á borði.

Hér ef ég stiklað á stóru í nokkrum málaflokkum en mun nefna fleiri málaflokka næst þegar ég sest við skriftir.

Friðrik Sigurðsson

Forseti sveitarstjórnar Norðurþings