Forsetinn opnaði Stéttina formlega í gær

10. des

Forsetinn opnaði Stéttina formlega í gær
Almennt - - Lestrar 294

Guðni Th. hringir hér bjöllu hússins.

Fjöldi gesta var viðstaddur opnun Stéttarinnar á Húsavík í gær við hátíðlega athöfn.

Forseti Íslands, hr. Guðni Th. Jóhannesson, opnaði þetta nýja húsnæði þekkingar-klasans á Hafnarstéttinni með því að hringja húsbjöllu sem hangir á vegg í miðrými hússins.

Eigendur húsnæðisins, Bjarni Aðalgeirsson og fjölskylda, afhentu svo fulltrúum Stéttarinnar húsnæðið formlega við mikið lófatak viðstaddra.

Valdimar Guðmundsson og hljómsveitin Flón spiluðu að lokum ljúfa tóna fyrir gesti á meðan þeir skoðuðu húsnæðið.

Á Húsavík hefur undanfarna tvo áratugi þróast öflugt þekkingarsamfélag sem vinnur fjölbreytt rannsóknarstarf á vegum Þekkingarnets Þingeyinga, Háskóla Íslands, Náttúrustofu Norðausturlands og fleiri stofnana.

Síðustu ár hefur svo verið unnið markvisst að því að þróa þekkingarsamfélagið að auknum tengslum við atvinnulífið. Sem dæmi má nefna að Hraðið, ný miðstöð nýsköpunar með fullbúnu FabLabi fyrir frumkvöðla, nemendur, atvinnulíf og íbúa svæðisins, hefur nú opnað í húsnæðinu.

Samtök sveitarfélaga á Norðurlandi eystra (SSNE) hafa einnig bæst í klasann sem gefur starfseminni á Stéttinni mikilvæga tengingu við atvinnulífs svæðisins og þjónustu.

Að sögn Óla Halldórssonar, forstöðumanns Þekkingarnets Þingeyinga, er afar ánægjulegt að sjá nú árangur undanfarinna ára raungerast með svo skemmtilegum hætti. Því megi þakka samstilltu átaki stofnananna í klasanum, stjórnvalda, sveitarfélagsins og húseigenda. Hann bendir á að hraðar tækniframfarir síðustu ára hafi haft mikil áhrif á atvinnulíf á landsbyggðinni og mikilvægt sé að

bregðast við þeim áskorunum og tækifærum sem því fylgir með aukinni fræðslu og stuðningi við frumkvöðla og nýsköpun.

Alls eru nú rúmlega 30 manns starfandi á Stéttinni og fer sú tala hækkandi. Hann segir mikla eftirspurn eftir vinnuaðstöðu og þá sérstaklega meðal fólks sem sjái tækifæri í því að flytja út á land og vinna við störf sem krefjast ekki endilega sérstakrar staðsetningar. Afar ánægjulegt sé að finna áhuga yngra fólks sem vill flytja með fjölskylduna til svæðisins. Ekki er sjálfgefið að framtak sem þetta verði að veruleika enda krefjist það mikillar fjárfestingar í innviðum svæðisins.

Framlag Bjarna Aðalgeirssonar og fjölskyldu sé því ómetanlegt en framkvæmdir og fjárfesting við húsnæði Stéttarinnar eru alfarið á þeirra vegum og lýsa framsýni og trú þeirra á uppbyggingu atvinnulífs og mannauðs á svæðinu.

Einn af helstu kostum þessa klasa sé sú samsuða sem skapast með sambýli fræðslu- og rannsóknastarfs við nýsköpunar- og frumkvöðlastarf. Í raun má segja að tilgangurinn sé að skapa sem best flæði og jafnvel árekstra milli þessara sviða. Ekki megi vanmeta mátt samtalsins í þessu tilliti og hér sé því mikið lagt upp úr aðlaðandi fundaraðstöðu og sófahornum í húsinu og kaffikannan verði höfð í hjarta hússins en ekki í lokuðum skrifstofum.