Forseti sveitarstjórnar Norðurþings minntist Kristjáns Ásgeirssonar

Kristján Ásgeirsson.

Í upphafi fundar sveitarstjórnar Norðurþings í gær minntist Örlygur Hnefill Örlygsson forseti sveitarstjórnar Kristjáns Ásgeirssonar en hann lést á Hvammi, heimili aldraða þann 12. apríl síðastliðinn.

"Fallinn er frá Kristján Ásgeirsson, bæjarfulltúi, útgerðarmaður, verkalýðsleiðtogi og máttarstólpi í samfélagi okkar á Húsavík til áratuga.

Kristján fæddist 26. júlí 1932. Árið 1966 var Kristján ungur sjómaður á Húsavík og bauð sig fram í fyrsta sinn til bæjarstjórnar Húsavíkur en hann skipaði þá 6. sæti á H-lista óháðra á Húsavík, en Ásgeir Kristjánsson faðir hans leiddi það framboð. Kristján sat aftur í 6. sæti listans í kosningunum 1970. 

Kristján leiddi K-listi óháðra og Alþýðubandalags í bæjarstjórnarkosningunum árið 1974 og var þá kjörinn inn í sveitarstjórn í fyrsta sinn, sem þriðji maður í 9 manna sveitarstjórn. Í kosningunm árið 1978 leiddi Kristján K-listann til sigurs en listinn fékk mest fylgi og þrjá menn kjörna.

Árið 1982 leiddi Kristján G-lista Alþýðubandalags og óháðra og leiddi hann þann lista sömuleiðis í kosningunum 1986, 1990 og 1994. Í kosningunum árið 1998 leiddu Alþýðuflokkur og Alþýðubandalag saman hesta sína, og aftur var Kristján kominn á H-lista, en hann leiddi það framboð til sigurs og hlaut framboðið hreinan meirihluta í sveitarstjórn þá. Í kosningunum 2002 dróg Kristján sig í hlé, en sat í heiðurssæti H-listans kjörtímabilið 2002 til 2006. 

Kristján sat sem aðalmaður í sveitarstjórn frá 1974 til 2002, í hartnær þrjá áratugi. 

Á framboðslistum sat Kristján 10 sinnum, í alls 40 ár.

Kristán þótti stundum harður í horn að taka þegar hann barðist fyrir sínum málum og var gríðarlega fylginn sér í þeim málum sem hann beitti sér fyrir. Fyrrum félagar hans, samherjar og mótherjar úr bæjarstjórn Húsavíkur bera honum vel söguna.

Kristján var mikill fjölskyldumaður og þeir sem hann þekktu vissu að hann var miklu mýkri maður en út á við sást. Kristján gaf sér líka tíma til að tala við börn og hann talaði við börn eins og jafningja, því kynntist sá sem hér stendur sem barn sem stundum sat og beið móður sinnar á fundum bæjarstjórnar.

Fjölskyldu Kristjáns votta ég samúð mína og bið fulltrúa að rísa úr sætur og minnast Kristjáns Ásgeirssonar með þakklæti fyrir hans störf í þágu samfélagsins". 

Örlygur Hnefill Örlygsson, forseti sveitarstjórnar