Fengu styrk til hjólabrautargerðar

Félagar í Hjóladeild Völsungs hafa unnið við gerð hjólabrautar sl. tvö ár. Brautin í fullri lengd mun vera um 5 km. en nú þegar er búið að gera 2,7 km. en sá hluti liggur frá bílastæðinu á Reykjaheiði og niður að Botnsvatni. Í sumar er stefnt að því að klára þessa braut og mun hún enda í Skrúðgarðinum á Húsavík.

 

Að sögn Aðalgeirs S. Óskarssonar formanns Hjóladeildar Völsungs hefur kjarnahópur innan deildarinnar unnið í sjálfboðavinnu við að gera þessa braut að veruleika og þá hafa fyrirtæki á Húsavík hafa stutt deildina með vinnu og tækjakaupum.

"Við fengum þessa hugmynd um haustið 2020 að stækka og lengja brautina og koma henni alla leið niður að Skrúðgarði. Við lögðum inn erindi til Norðurþings og mættum þar strax jákvæðni.

 

Enda sýndi það sig síðasta sumar að hjólabrautin niður að Botnsvatni (fyrri hluti brautarinnar) var vinsæl og hafði mikið jákvæð áhrif, ekki bara á gestakomu til Húsavíkur heldur líka þegar horft er til lýðheilsu sjónarmiða og almennrar hreyfingar og hreysti" segir Aðalgeir.

Það var strax ljóst Hjóladeildin gæti aldrei gert þetta á sama hátt og fyrri hlutann því landið er erfiðara að eiga við og þarfnast meiri vélavinnu. Það var því farin sú leið að finna fjármagn fyrir verkefnið. 

 

"Við Gunnólfur Sveinsson settumst því niður með Valdimar Halldórssyni og fórum yfir hvaða möguleikar væru í boði, settum upp verkáætlun og lýsingu á verkefninu og sendum það á nokkra staði. Valdimar rak augun í þann möguleika að sækja um í þennan sjóð og sendi vandaða umsókn þangað í umboði okkar og Völsungs, því við erum undir almenningsíþróttadeild Völsungs.