Færðu Velferðarsjóði Þingeyinga ágóða einnar sýningar á Grease

Sr. Halla Sólveig ásamt nemendum 10. bekkjar.

Nemendur 10. bekkjar Borgarhólsskóla komu færandi hendi í Húsavíkur-kirkju í morgun þar sem þau afhentu gjöf til Velferðarsjóðs Þingeyinga. 

Það var á vordögum sem nemendur tíunda bekkjar frumsýndu leikritið Grease í leikstjórn Karenar Erludóttur.

Uppsetning á leiksýningu er liður í fjáröflun fyrir skólaferðalag þeirra.

Sýningin hlaut afar góða dóma og sýnt var fyrir fullum sal á öllum sýningum. Krakkana langaði til að hafa aukasýningu enda mikil eftirspurn.

Þá kviknaði sú hugmynd að halda góðgerðarsýningu enda höfðu nemendur náð fjáröflunarmarkmiðum sínum fyrir ferðina í samstarfi við kennarann sinn, Nönnu Möller.

Samfélagið hefur stutt vel við bakið á nemendum og vildu sýna velvilja og skila ágóða einnar sýningar til samfélagsins. 

Eins og segir fóru nemendur bekkjarins ásamt kennaranum sínum til fundar við Höllu Sólveigu Kristjánsdóttur sóknarprest í Húsavíkurkirkju.

Þar tók hún á móti ágóða einnar sýningar, alls 185.500 kr., sem renna eins og fyrr segir í Velferðarsjóð Þingeyinga.

Sr. Halla Sólveig tók á móti gjöfinni fyrir hönd sjóðsins.

Sr. Halla Sólveig kynnti Velferðarsjóð Þingeyinga fyrir nemendunum en starfssvæði hans eru Þingeyjarsýslurnar tvær.