Biðstofan

Á biðstofu Norðurþings.

Ég geng inn á biðstofu Norðurþings og fæ mér sæti. Það ómar létt tónlist í eyrunum ásamt tilkynningum.

Ég gríp eitt blað á meðan ég bíð. Á forsíðu blaðsins er fjallað um fráveituframkvæmdir á Húsavík. Í umfjöllun um málið kemur fram að kostnaður vegna framkvæmd-anna nemi um um 140 milljónir króna á þessu og síðasta ári. Í kallkerfinu á biðstofunni tjáir þulur biðstofugestum að sveitar-félagið Norðurþing hafi varið um 73 milljónum króna í nýtt mötuneyti í Borgarhólsskóla ásamt uppbyggingu í gömlu búningsklefunum.

Ég held áfram að lesa blaðið en í ritstjórnargrein blaðsins er fjallað um uppbyggingu íþróttamannvirkja, gervigrasvöll og vallarhús á Húsavík og sparkvöll á Raufarhöfn. Það kemur fram í greininni að nýting sé afar góð bæði meðal barna og fullorðinna. Í litlu fréttaskoti segir frá viðbyggingu við leikskólann Grænuvelli á Húsavík og nýja lóð við leikskólann á Raufarhöfn.

Blöðin á biðstofunni

Í heilsíðugrein er greint frá skipulagsmálum enda hafi æði mörg skipulög verið unnin síðustu ár. Má þar sjá skipulag vegna urðunarstaða, hótelbygginga, jarðgangna í gegnum Húsavíkurhöfða, ferðaþjónustu í Kelduhverfi og hafnasvæðið á Húsavík. Þá glymur röddin í kallkerfinu og sagt er frá aðkomu sveitarfélagsins að Húsavíkurflugvelli, Dettifossvegi og Hófaskarðsleið. Einnig þylur röddin upp að Hafnarstéttin á Húsavík hafi verið breikkuð, Suðurgarður gerður að einni glæsilegustu trébryggju landsins og flotbryggjum fjölgað.

Ég ákveð að fá mér nýtt blað. Ég fletti snöggt í gegnum það en staldra við grein þar sem sagt er frá uppbyggingu Verbúðanna á Húsavík. Þar munu listamenn hafa aðsetur og staðurinn vera suðupottur menningar, nýsköpunar og lista. Einnig vekur athygli umfjöllun um viðhald á Kvíabekk sem stendur í Skrúðgarðinumá Húsavík en til stendur að hlaða upp torfbæ ásamt endurnýjun á húsinu sjálfu. Í frásögn um byggingamál er sagt frá byggingu íbúða fyrir geðfatlaða við Pálsgarð.

Þykku blöðin

Í öðru blaði er fjallað um alvarlegri mál s.s. ákvörðun Vísis hf. að loka vinnslu á Húsavík. Fram kemur að fulltrúar sveitarfélagsins hafi varið umtalsverðum tíma í það mál enda snúið og eigi sér langa sögu. Það segir jafnframt frá öllum samningum við fyrirtækið PCC sem hyggur á framkvæmdir. Einnig er sagt frá verkefninu Brothættar byggðir á Raufarhöfn þar sem sveitarfélagið hefur átt talsverða aðkomu. Þar hafi komið inn 400 þorskígildistonn sem munar um á staðnum og styrkir byggðina. Á Kópaskeri er risin lifrarbræðsla og segir í frétt um hana að fulltrúar sveitarfélagsins hafi átt aðkomu að málinu. Í lítilli grein má lesa um aðkomu sveitarfélagsins að ráðhúsinu á Raufarhöfn sem tryggir m.a. póstþjónustu og aðra starfsemi hins opinbera. Á baksíðu blaðsins má sjá umfjöllun um endurskipulagningu á Orkuveitu Húsavíkur sem er nú virkilega stöndugt fyrirtæki sem íbúar sveitarfélagsins geta verið stoltir af.

Mörg blöð eftir

Á biðstofuborðinu liggja mörg blöð sem ég næ ekki að glugga í. Það ískrar í kallkerfinu og ég fæ tilkynningu að senn komi röðin að mér að yfirgefa biðstofuna. Áður en ég stend á fætur grípur augað lítill bæklingur sem á stendur: „Tími kjósenda“. Í bæklingunum er fjallað um að tíminn framundan sé tími kjósenda. Hversu mikilvægt það er að kjósendur láti í sér heyra og þá kröfu þeirra að á þá sé hlustað. Þegar ég stend loksins á fætur til að yfirgefa biðstofuna verður veggspjald á vegi mínum sem á stendur; „það er alltaf hægt að gera betur, gerum það saman“. Röddin í kallkerfinu segir röðina komna að mér og ég yfirgef biðstofuna.

Hjálmar Bogi Hafliðason

Bæjarfulltrúi í Norðurþingi