Ásgeir með tvö mörk í sigri á Leikni F

Ásgeir í leik gegn Leikni F. Mynd úr safni.

Ásgeir Kristjánsson skoraði tvö mörk í sigurleik gegn Leikni F á Húsavíkurvelli í gær.

Leikurinn var í 4. riðli B-deildar Lengjubikarsins og nokkur spenna í gangi þar sem Völsungur átti möguleika á að enda á toppi riðilsins og fara áfram.

En til þess að svo færi þurfti Fjarðabyggð að ná amk. stigi gegn Dalvík/Reyni sem þeim tókst ekki og Dalvík/Reynir gjörsigraði þá 7-0. 

En Völsungar fóru vel af stað gegn Leikni F og áður en fyrri hálfleikur var hálfnaður var Ásgeir búinn að skora í tvígang. Rúnar Þór Brynjarsson kom Völsungi í 3-0 þegar tæpur stundarfjórðungur var til leiksloka.

Leiknismenn náðu að klóra í bakkann og skora tvö mörk á síðustu 10 mínútum leiksins. Lokastaðan 3-2 fyrir heimamönnum.

Völsungur nær því ekki að verja titilinn sem þeir unnu í fyrra en bæði Völsungur og Dalvík/Reynir voru með 9 stig en Eyfirðingarnir með betri markamun.

Hér má sjá lokastöðuna