Ársreikningur Norðursiglingar fyrir árið 2021 birtur- Hagnaður vegna eignasölu og bjart framundan

Tekjur Norðursiglingar, sem rekur meðal annars umfangs-mikla hvalaskoðun á Húsavík og á Hjalteyri, námu 421 milljón króna á árinu 2021, samanborið við 171 milljón króna á árinu áður.

Rekstrarhagnaður (EBITDA) nam 161,6 milljónum króna og hagnaður fyrirtækisins eftir afskriftir,fjármagnsliði, áhrif hlutdeildarfélaga  og reiknaða skatta nam 150,4 milljónum króna. 

Fyrirtækið glímdi sem fyrr við áskoranir sem fylgdu Covid-19 heimsfaraldrinum, líkt og önnur ferðaþjónustufyrirtæki um allan heim. Fyrirtækið nýtti sér úrræði stjórnvalda á árinu 2021 og greip til áframhaldandi hagræðingaraðgerða s.s eignasölu, almennu aðhaldi í rekstri, fjárhagslegrar endurskipulagningar og frestunar afborgana af langtímaskuldum. 

Á árinu 2021 seldi Norðursigling 29% eignarhlut sinn í Sjóböðunumá Húsavík (GeoSea) og hafði salan verulega jákvæð áhrif á afkomu fyrirtækisins á liðnu ári. Þá benda bókanir og fyrirspurnir til þess að rekstrarumhverfi Norðursiglingar verði hagfellt á næstunni. Stjórnendur gera ráð fyrir að afkoma fyrirtækisins verið góð á þessu ári og hagnaður verði af rekstrinum.

Þrátt fyrir erfiðleika í rekstrarumhverfi hefur starfsfólk Norðursiglingar staðið þétt saman og tryggt öflugan rekstur fyrirtækisins ásamt því að viðskiptavinir hafa verið fyrirtækinu tryggir.  

Eignir Norðursiglingar námu rúmlega 1,4 milljörðum króna í árslok 2021 og var eigið fé rúmlega 292 milljónir króna, sem er töluverð hækkun frá árinu áður. Launakostnaður fyrirtækisins jókst og nam 121 milljónum króna, samanborið við 72 milljónir króna árið áður, en stöðugildi voru 19 á ársgrundvelli og 46 starfsmenn á launaskrá yfir sumartímann.

Stærsti hluthafi Norðursiglingar er Eldey eignarhaldsfélag hf., en aðrir eigendur fyrirtækisins  eru stofnendur félagsins og félög tengd stjórnarformanni þess. 

Nánar um Norðursiglingu

Norðursigling er leiðandi fyrirtæki í sjávartengdri ferðaþjónustu, hvalaskoðun, siglingum og náttúruskoðunum. Meginhluti starfsemi samstæðunnar er á Skjálfanda, með aðsetur á Húsavík.

Fyrirtækið býður styttri og lengri skútusiglingar meðal annars við strendur Austur-Grænlands auk ævintýraferða. Norðursigling starfrækir einnig ferðaskrifstofu og slipp fyrir skip og báta við Húsavíkurhöfn.