Alli Jói og Ólafur Jóhann í heimsókn hjá Norwich

Alli Jói og Ólafur Jóhann. Lj. Börkur E

Völsungarnir Aðalsteinn Jóhann Friðriksson og Ólafur Jóhann Bergmann Steingrímsson hafa undanfarna daga dvalið hjá enska knattspyrnuliðinu Norwich.

Norwich er höfuðborg Norfolksýslu á Austur Anglíuskaga.

Alli Jói kynnti sér þjálfun hjá félaginu á meðan Ólafur Jóhann æfði með U18 ára liði Norwich. 

Boðsferð þeirra félaga er tilkomin vegna tengsla félaganna en eins og kunnugt er leikur Atli Barkarson ýmist með U18 eða U23 ára liðum Norwich. 

“Ég æfði með liðinu í þrjá daga” sagði Ólafur Jóhann við 640.is í dag en þá voru þeir félagarnir að horfa á U18 ára lið Norwich keppa við Fulham. Atli lék ekki með í dag en Fulham sigraði leikinn 2-0. Um miðjan dag var svo horft á leik Norwich gegn Bristol City í Championshipdeildinni sem Kanarífuglarnir unnu 3-2.

Eins og áður sagði æfði Ólafur Jóhann með unglingaliði Norwich og sagði hann æfingarnar hafa verið mjög skemmtilegar og hraðar en það var æft 2-3 sinnum á dag.

Ólafur Jóhann segir það hafa gert mikið fyrir sig að fá tækifæri til að æfa með Norwich, gaman hafi verið að sjá hvernig þeir æfa og þetta fer klárlega í reynslubankann. Aðspurður um hvernig það hafi verið að bera sig saman við þessa stráka segir hann að mat sitt sé að getumunurinn sé nú kannski ekki svo mikill. Það hafi hinsvegar verið erfitt að venjast hraðanum á æfingunum á svona stuttum tíma. 

Að lokum, hvar endar Völsungur í 2. deildinni í sumar ? “Við förum upp, það þýðir ekkert að stefna á neitt annað” sagði Ólafur Jóhann Bergmann.

Æskufélagarnir Ólafur Jóhann og Atli á æfingasvæði Norwich.