Afturelding sigraði Völsung í þremur hrinum

Blaklið Völsungs.

Völsungur og Afturelding mættust í gær á Húsavík í Mizunodeildinni og sigraði Afturelding leikinn nokkuð örugglega 0-3 (14-25, 22-25, 18-25).

Afturelding byrjaði betur í fyrstu hrinunni og voru þær með sex stiga forskot í stöðunni 4-10. Þá kom frábær kafli hjá Völsung sem náði að minnka muninn í tvö stig í stöðunni 10-12. Afturelding setti þá í annan gír í sókninni og fengu þær níu stig í röð. Staðan var því orðin 10-21 og erfitt fyrir Völsung að brúa bilið. Afturelding kláraði fyrstu hrinuna örugglega 14-25.

Önnur hrina var jöfn allan tíman og skiptust liðin á því að hafa yfirhöndina í hrinunni. Jafnt var í stöðunni 22-22 en þá skoraði Afturelding þrjú stig í röð og tryggðu sér sigur í hrinunni 22-25.

Liðin byrjuðu jöfn í þriðju hrinu og var jafnt í stöðunni 14-14. Afturelding átti þá stórgóðan kafla þar sem þær skoruðu 11 stig á móti fjórum hjá Völsung. Afturelding tók því hrinuna 18-25 og þar með leikinn 0-3

Stighæstar í leiknum voru Haley Rena Hampton frá Aftureldingu og Sladjana Smiljanic frá Völsung með níu stig hvor. (blakfréttir.is)