Af hverju kvennafrí?

Samfélagið sem við höfum skapað er kynjað. Konur eiga að vera þægar og góðar og ekki nota orð eins og djöfulsins fokk en karlar eiga að vera sterkir, ekki barma sér og nota frasa eins og fiðrum þær og tjörgum þegar þeim þykja feministarnir hafa gengið of langt. 

Sem betur fer erum við að breytast. Þó er það enn svo að meðalheildarlaun kvenna eru einungis 74% af meðalheildarlaunum karla hér á landi sem gerir það að verkum að konur hafa ekki sömu tækifæri og karlar. 

Enn hvaða ávinningur hlýst af því að stuðla að jafnrétti og vinna gegn þessu kynjaða umhverfi? Samkvæmt rannsóknum Credit Suisse þá sýna fyrirtæki fram á meiri arðsemi eigin fjár eftir því sem hlutur kvenna í stjórnunarstörfum eykst. Fyrir utan það er jákvætt fyrir einstaklinga að velja sér lífsviðurværi og lífsferil út frá eigin hæfileikum og óskum frekar en fyrirframgefnum staðalímyndum kynja. 

Þeir sem telja að hæfasta fólkið veljist í stjórnunarstörf hljóta þá að halda að konur séu vanhæfari því í dag samkvæmt upplýsingum Catalyst eru konur um fjórðungur stjórnenda í heiminum. Á meðan svo er, er ólíklegt að breytingar verði nema með meðvituðum ákvörðunum vegna þess að við ráðum helst fólk með sömu eiginleika og við. Það sýndi sig í samtali við 120 yfirmenn í rannsókn sem prófessor frá Kellogg School of Management gerði árið 2014. Gleymum því heldur aldrei að í seinni heimsstyrjöldinni tóku konur í Bretlandi við vinnumarkaðnum og stóðu sig jafnvel og karlarnir í öllum störfum.  

Enn erum við kannski komin þangað sem við viljum?
Á Íslandi erum við gríðarlega framarlega miðað við aðra og það er vel. Hinsvegar eru konur valdalausar víðsvegar í heiminum og eru skipulega beittar ofbeldi. Það að valdefla konur hér á Íslandi smitar út frá sér og gerir okkur frekar kleift að berjast fyrir grunnmannréttindum kvenna í heiminum. Í dag er eitt helsta baráttumál kvenna ofbeldi gegn konum og Alþjóðaheilbrigðisstofnunin áætlar að ein af hverjum þremur konum í heiminum hafi verið beitt ofbeldi.

Aukinn ójöfnuður í heiminum stuðlar að fátækravæðingu sem hefur mun meiri áhrif á konur en karla. Sú staðreynd að átta karlmenn í heiminum eiga jafn mikið og fátækari helmingur heimsins er ógnvænleg og sýnir skýrt landslagið. Sumstaðar í heiminum er hlutfall heildarlauna kvenna af heildarlaunum karla 31%. Þetta er allt hægt að sjá í skýrslu Oxfam „An ecomony for the 99%“.

Enn hvað geta sveitarfélög gert til að leggja sitt lóð á vogarskálarnar?
Mörg sveitarfélög hafa sett saman jafnréttisstefnu og Norðurþing er eitt af þeim. Þrátt fyrir að allir flokkar í sveitastjórn á síðasta kjörtímabili hafi skrifað undir jafnréttisstefnuna árið 2016 þá voru kynjahlutföll við lok síðasta kjörtímabils ójöfn í ráðum og nefndum sveitarfélagsins. Við upphaf núverandi kjörtímabils lagði meirihlutinn sig allan fram um að  fara eftir jafnréttisstefnunni og þannig veita konum meira aðgengi að framkvæmdamálum og körlum meira aðgengi að uppeldismálum svo að dæmi séu nefnd.

Búið er að stíga mikilvægt skref í átt að jafnrétti og munum við áfram vinna að því. Áfram við! 

Silja Jóhannesdóttir, sveitarstjórnarfulltrúi Samfylkingar í Norðurþingi