Styrkur til uppbyggingar bílastæðis og gönguleiðar að Gatanöf

Gatanöf á vorkveldi.

Lilja Dögg Alfreðsdóttir, menningar- og viðskiptaráðherra, úthlutaði á dögunum úr Framkvæmdasjóði ferðamannastaða fyrir árið 2024.

Að þessu sinni hljóta 29 verkefni styrk úr sjóðnum, samtals að fjárhæð 538,7 milljónir króna, og dreifast þau um land allt.

Fram kemur í tilkynningu á vef Ferðamálastofu að Norðurþing fékk sjö milljóna styrk til að búa Gönguleið að Gatanöf og Bakkahöfða.

Gönguleið frá bílastæði að Gatanöf verður breikkuð og borið í hana trjákurl.

Á leiðinni þarf að brúa einn læk með 3x1,6 m göngubrú úr gagnvörðu timbri. Þegar að Gatanöf er komið hafa ferðamenn val um að halda áfram og skoða útsýni frá Bakkahöfða eða halda til baka sömu leið að bílastæði og það kom. Gönguleiðin upp Bakkahöfða verður stikuð og mun liggja upp höfðann og til norðurs áður en stefnan er tekin að bílastæði. Bílastæði verður byggt upp við upphaf gönguleiðarinnar.

Gert verður ráð fyrir að amk. 6 bílar geti lagt við planið á sama tíma. 

Gatanöf við Bakkahöfða norðan við Húsavík nýtur sívaxandi vinsælda meðal ferðamanna. Aðstæður þar í dag bjóða ekki upp á mikla umferð ásamt því að hentistígar hafa myndast sem geta skapað hættu. Styrkur er veittur til uppbyggingar bílastæðis og gönguleiðar til að auka öryggi og vernda náttúru.