Þeistareykjarvegur syðri nú opinn fyrir almennri umferð

Frá framkvæmdum við Þeistareykjaveg syðri.

Í gær var lokið við að leggja efra lag klæðningar á Þeistareykjaveg syðri.

Vegurinn er nú opinn fyrir almennri umferð, enn á eftir að merkja veginn, stika og sópa. Verktaki við gerð vegarins var Árni Helgason ehf.

Á árunum 2019-2022 hefur Landsvirkjun byggt upp Þeistareykjaveg syðri sem er nýr 19 km vegur frá Þeistareykjum að Kísilvegi á Hólasandi.

Með þessari vegtengingu kemst á heilsársleið á milli Þeistareykja og Mývatnssveitar og mun vegurinn auðvelda samrekstur aflstöðva Landsvirkjunar á Norðausturlandi, það er Þeistareykjastöðvar, Kröflustöðvar og Gufuaflsstöðvarinnar í Bjarnarflagi.

"Um leið opnast spennandi hringleið fyrir ferðamenn inn á stórbrotið svæði með eldgígum, hraunum, jarðsprungum og hverasvæðum". Skrifar Hreinn Hjartason á Fésbókarsíðu sinni en hann tók meðfylgjandi mynd.

Frá framkvæmdum við Þeistareykjaveg syðri.