Sigurjón vann sinn fyrsta happdrættisvinning á tíræðisaldri

Sigurjón ritar nafns sitt í afmælisgestabók ÍFV.

Sigurjón Jóhannesson sem verður 93 ára 16. apríl n.k. keypti miða á dögunum í happdrætti meistaraflokka Völsungs. 

Á heimasíðu Völsungs segir að hann hafi í áratugi verið duglegur að styðja ýmis félög með happdrættismiðakaupum og á annan hátt, ekki síst Völsung þar sem hann greiðir enn félagsgjald. Og rennur þar blóðið til skyldunnar þar sem hann þótti stórhættulegur og eldsnöggur miðherji með Völsungsliðinu um miðja síðustu öld.

Ekki átti þessi aldna kempa von á vinningi í happdrætti Völsungs að þessu sinni frekar en áður í slíkum, því kominn á tíunda áratuginn hafði hann aldrei fengið happdrættisvinning þrátt fyrir regluleg miðakaup í áratugi. Hugsanlega er skýringin m.a. sú að hann hefur aldrei athugað hvort hann hafi fengið vinning, enda tilgangurinn með kaupunum að styrkja en ekki vinna.

Hann hafði heldur engin áform um að kanna þá stöðu nú í happdrætti Völungs, en gestkomandi rakst á miðann hans á glámbekk og spurði Sigurjón hvort hann ætti að kanna hvort vinningur hefði komið á miðann. Hann taldi það algjöran óþarfa, hann hefði aldrei unnið neitt og færi varla að taka upp á því á tíræðisaldri.

En lengi er von á einum og viti menn, Sigurjón fékk happdrættisvinning! Og það myndarlegan, sem sé ársmiða á leiki KA á Akureyri að verðmæti 30 þúsund.  Hann var hinsvegar ekki viss um að hann gæti nýtt sér vinninginn að fullu, bensín væru jú nokkuð dýrt og það kostaði örugglega sitt að greiða bílstjóra laun fyrir akstur milli Húsavík og Akureyrar aðra hverja helgi í sumar!