Nýr samstarfssamningur Landsbankans og Völsungs


Jónas Halldór og Bergþór handsala samninginn.

Völsungur og Landsbankinn á Húsavík hafa gert með sér samstarfssamning til tveggja ára um stuðning bankans við allar deildir félagsins næstu árin. 

Landsbankinn hefur verið einn af aðalstyrktaraðilum Völsungs  mörg undan farin ár. Það voru  Jónas Halldór Friðriksson framkvæmdastjóri  Völsungs og Bergþór Bjarnason útibússtjóri á Húsavík sem undirrituðu samninginn í dag.

Í tilkynningu segir að samkvæmt samningnum fái deildir félagsins árlega greiðslu eins og í fyrri samningi. Völsungur úthlutar fjármunum samkvæmt sínum áherslum og skal gæta jafnræðis í úthlutun þeirra fyrir karla- og kvennaflokka eins og kostur er.  Landsbankinn og Völsungur munu vinna saman að vímuvarnarstefnu Völsungs og skal hluta af styrk bankans varið í námskeiðahald í vímuvörnum fyrir þjálfara og félagsmenn Völsungs.

„Samningurinn við Völsung er afar mikilvægur  fyrir okkur og er stærsti einstaki styrktarsamningur útibúsins. Völsungur er burðarás í æskulýðs- og íþróttastarfi bæjarins og því er mjög mikilvægt að leggja félaginu lið,“ segir Bergþór Bjarnason, útibússtjóri Landsbankans á Húsavík. 

Það er einnig mikil ánægja að tilkynna að við sama tilefni skrifuðu fjórir ungir og efnilegir uppaldir leikmenn undir tveggja ára samning við knattspyrnudeild Völsungs. Um er að ræða Ólaf Jóhann Steingrímsson, Kristu Eik Harðardóttir, Daníel Má Hreiðarsson og Guðrúnu Maríu Guðnadóttir.

Allt eru þetta leikmenn sem koma upp í gegnum öflugt yngri flokka starf félagsins og hafa sett mark sitt á meistaraflokka í knattspyrnu. Mikil ánægja er innan raða félagsin með undirskrif þessara leikmanna og um leið samstarfssamninginn við Landsbankann.

Jónas Halldór Friðriksson framkvæmdastjóri  Völsungs og Bergþór Bjarnason útibússtjóri á Húsavík sem undirrituðu samninginn í dag. Að baki þeim standa fv. Daníel Már Hreiðarsson, Krista Eik Harðardóttir, Guðrún María Guðnadóttir og Ólafur Jóhann Steingrímsson en þau skrifuðu undir tveggja ára samning við Völsung við þetta tækifæri.