Blakdeild Völsungs ræður ungverska þjálfara

Tamas Kaposi og Tamara Kaposi-Petö.

Blakdeild Völsungs hefur ráðið ungverkst par, Tamas Kaposi og Tamöru Kaposi-Petö, sem þjálfara fyrir komandi keppnistímabil.

Þau munu þjálfa og leika með blakliðum Völsungs í meistara-flokkum karla og kvenna  og auk þess  þjálfa alla yngri flokka og öldungaflokka blakdeildar Völsungs.

Tamas er 29 ára gamall og hefur mikla reynslu bæði sem leikmaður og þjálfari. Hann hefur  orðið ungverskur meistari með sínu félagsliði nokkrum sinnum bæði sem leikmaður og þjálfari og á að baki leiki með ungverska landsliðinu.

Tamara er 25 ára gömul. Hún hefur leikið í efstu deild í Ungverjalandi og á einnig að baki landsleiki fyrir Ungverja. Tamara hefur einnig talsverða reynslu sem þjálfari þó ung sé að árum  og hefur unnið ungverska meistaratitla  með sín yngri flokka lið.

Í tilkynningu segir að stjórn Blakdeildar sé stórhuga og full tilhlökkunar til komandi tímabils og næstu ára.  Fjöldi bráðefnilegra ungmenna æfa blak á Húsavík og framtíðin er björt í blakstarfinu hjá blakdeild Völsungs